အစ်ကိုကြီးတို့အစ်မကြီးတို့

စိတ်မရှိပါနဲ့ဗျာ။ စာဖတ်သူတွေကို ခေါ်တာမဟုတ်ပါဘူး။ အခုတလောသူတို့တွေကို သတိရစိတ်ပေါ်ပေါ်လာလို့ပါ။ ကျနော်တို့အရပ်က လူတွေဆိုရင်တော့ သိကြမှာပါ။ အစ်ကိုကြီးတို့ အစ်မကြီးတို့ဆိုတာ……

ကျနော်တို့အရပ်က နေ၀င်ပြီလို့ မိုးစုန်းစုန်းချုပ်ခဲ့ရင် သူတို့တွေရဲ့ အသံကို ကြားရပါပြီ။ သူတို့ အမြဲအော်အော်နေတာက အစ်ကိုကြီးတို့အစ်မကြီးတို့ရယ် ထမင်းလေး ဟင်းလေးကျန်သနားပါ့ဗျာဆိုတာလေးပါ။ ကျနော်တို့အိမ်တွေက ပိုတဲ့ထမင်းဟင်းတွေကို စုပေါင်းစပ်ပေါင်းလုပ်ပြီး သူတို့မှာ စားကြရတာ။ ကလေးတွဲလောင်းတွေလည်းပါတယ်။ အ၀တ်အစားတွေဆိုတာ တကယ့်ကို အရှက်လုံတယ်ဆိုရုံ။ ဆံပင်တွေကလည်း မလျှော်ပဲထားလို့ထင်ပါရဲ့ ပီကေနဲ့ကပ်သလို အုံလိုက်ကြပ်ခဲနေတတ်တယ်။ တစ်ချို့ကတော့ သားသည်အမေ တစ်ချို့က သားလောင်းမိခင် အိုကြီးအိုမ အဘိုးကြီးအဖွားကြီးတွေလည်းလက်ဆွဲလို့ ပါတတ်တယ်။ သူတို့တွေဘယ်လိုကြောင့် ဒီလိုဖြစ်နေရတာလဲ။ ငါတို့က ဘာဖြစ်လို့ ဒီလိုအမြဲပေးနေရတာလဲ လို့ မသိစိတ်နဲ့ ငယ်ငယ်ကတော့ အဖြေမထွက်ခဲ့ဘူး။

သူတို့ကို ကျနော်ပိုသနားမိသွားတာက ကိုပေါက်စီနဲ့မမယ်သုန်ကြောင့်ဖြစ်မယ်ထင်တယ်။ မယ်သုန်ရဲ့ ပုဗ္ဗေစ အခြေမလှတဲ့သူကို သဒ္ဒါတတ်အားနည်းများမဆို ပေးကမ်းစေလို ဆိုတဲ့ သနားစဖွယ်အသံလေးက နားထဲရောက်ရောက်လာတတ်တယ်။ သူတို့ရဲ့ အစ်ကိုကြီးတို့အစ်မကြီးတို့ဆိုတဲ့ အသံကလည်း ဤနည်းနှင်နှင်။ ငယ်ငယ်က ဘုမသိဘမသိနဲ့ အဲဒီ အသံနှစ်ခုကို ရွတ်မိရင်အခေါက်ခံရပါတယ်။ အိမ်မှာ အလှူဖြစ်ဖြစ် သူများ မင်္ဂလာဆောင်တွေမှာ အကူဖြစ်ဖြစ်လုပ်ဖြစ်ခဲ့ရင် တန်းစီစောင့်နေတဲ့ သူတို့ကို လက်မလည်အောင်ထည့်ပေးနေကြက ကျနော်ပါ။

အခုသူတို့ကို သတိရမိတာက ဒီကစားသောက်ဆိုင်တွေကြောင့်ပါ။ အပိုတွေမှအများကြီးဗျာ။ စားလျက်တန်းလန်းတွေ စားလို့မကုန်ပဲကျန်နေတာတွေ။ အစ်ကိုကြီးတို့အစ်မကြီးတို့တွေလည်း ဒီမှာမရှိ။ အားလုံးကို ပုံးတွေထဲသွန် အကုန်သွန်။ ဘာဖြစ်လို့အစ်ကိုကြီးတို့ အစ်မကြီးတို့က ဒီမှာမရှိတာလည်း။ ကျနော်တို့အရပ်ကနေ သူတို့ကို ဒီကို ခေါ်လိုက်ရင် ကောင်းမလားစဉ်းစားနေမိတယ်။ ဘယ်ဖြစ်နိုင်ပါ့မလဲနော်။ ဒါဆို ဒီကဆိုင်တွေကို အဲဒီမှာလည်းဖွင့်ရင်ရော။ ဖြစ်နိုင်မယ်ထင်လားဗျာ။

အိမ်မှာ ထမင်းတွေဟင်းတွေပိုပြန်ရင်လည်း အစ်ကိုကြီးတို့ အစ်မကြီးတို့သာရှိရင်ဆိုပြီးတွေးနေမိတယ်။ ဒါပေမယ့် သူတို့တွေကော ဟိုမှာရှိသေးရဲ့လား မသိ……….