ပိန်းကြာဖက်ကို ရေမတင်သကဲ့သို့

ငယ်တုန်းက မနက်မိုးလင်းရင် အဖွားရဲ့ အစိန္တေယျ အစချီတဲ့ ဘုရားရှိခိုးပြီး၊ ဆွမ်းကပ်၊ သောက်တော်ရေချမ်းကပ်၊ ပန်းကပ်ပြီးရင် တပြည်လုံးမှာ ရှိတဲ့ တန်ခိုးကြီးဘုရားအဆူဆူကို တိုင်တည်ဆုတောင်းသံကို ကြေးစည်မထုမချင်း ကြားရတတ်ပါတယ်..

ဟိုးအထက်ချင်းတောင် ဆုတောင်းပြည့်စေတီက စလိုက်တာ အောက်ပြည်အောက်ရွာက ဘုရားပုထိုးကုန်အောင်ရွတ်ပါတယ်။ ကျနော်တို့တွေ သူ့ကို ကန်တော့တဲ့အခါများဆို ရေလိုအေးလို့ ပန်းလို့မွှေးပါစေ၊ အိမ်ပြန်ခါနီးကန်တော့ ရင် အန္တရာကင်း ဘေးရှင်းပါစေ၊ သွားလမ်းသာလို့လာလမ်း ဖြောင့်ပါစေ၊ ခလုတ်မထိ ဆူးမငြိကြပါစေနဲ့၊ ဘုန်းကြီးပါစေ၊ အသက်ရှည်ပါစေ၊ အဆင်းလှပါစေ၊ ပညာတတ်ကြီးဖြစ်ပါစေ ဆိုတာမျိုး ဆုတွေတသီတတန်းကြီးချွေလို့

ပြီးတော့ ဒီနေ့တနေ့လုံး စိတ်ထဲကရော ပါးစပ်ဖျားကပါ အကြိမ်ကြိမ် ရေရွတ်နေမိတဲ့….

အနာရောဂါမှန်သမျှတို့ ပိန်းကြာဖက်ပေါ် ရေမတင်သလို အရှင်းလျှောကျ ပျောက်ကင်းကြပါစေ….

ပျောက်ဆုံးသွားသော ယုံကြည်ချက်နှင့် သူငယ်ချင်းမိတ်ဆွေများ

Credit: photo is from Lovinghugs.com
Money train ဆိုတဲ့ ဇာတ်ကားကို ကြည့်ပြီး ငယ်ဘ၀တလျောက်လုံး သိပ်စွဲလမ်းခဲ့တာပါ။ တယောက် ကိုတယောက် သစ္စာ စောင့်သိပြီး အသက်ပေးချစ်တဲ့ သူငယ်ချင်း မိတ်ဆွေဆိုတဲ့ ချစ်ခင်ခြင်းကို ကိုးကွယ်မိခဲ့တယ်။ ဇာတ်ကားဆိုတာ ဇာတ်ကားတခုပဲဖြစ်တာမို့ (ပြင်ပဘဝမှာ ရှိကောင်းရှိနိုင်ပါတယ် ဒါပေမယ့် ရှိခဲပါဘိခြင်း)။ ယုံမယ့်သာယုံနေတာ ဖြတ်သန်းလာခဲ့ရတဲ့ ဘ၀နဲ့စာတော့ ဘယ်လိုမှ မအပ်စပ် မဖြစ်ပျက်နိုင်ဘူးဆိုတာကို အတိုင်းသား မြင်နိုင်တယ်။ ဒါပေမယ့် ယုံကြည်နေတုန်းပဲ တနေ့တလံပေါ့……………

အိမ်က အဖိုးအဖွားက သားသမီး ၁၃ယောက်ပွားစီးပါတယ်။ ဒါပေမယ့် ၅ယောက်ပဲ အသက်ရှင်ကျန်ခဲ့တယ်။ အကြီးတွေ အကုန်လုံး ရောဂါမျိုးစုံနဲ့ ကုန်လွန်ကြတော့ အဖိုးအဖွားတို့မှာ အားကိုးအားထားရယ်လို့ မရှိရှာဘူးပေါ့။ အဲ့ဒီတော့ နီးစပ်ရာ တူမောင်သားချင်းတွေကို သားသမီးအဖြစ်မွေးစားခဲ့တယ်ဆိုတယ်။ ပထမ မွေးစားသားက အတော်လေး လုပ်တတ်ကိုင်တတ်တယ်တဲ့။ ဒါပေမယ့် မုံရွာမြို့မီးဘေးကြီး ဖြစ်တော့ ကမ်းနားလမ်း အိမ်ကြီးကနေ ခွေးပြေးဝက်ပြေး ပြေးကြရတယ်။ မွေးစားသားက အဖေတို့အမေတို့ ပြေးနှင့်ကြတော့ သား မီးခံသေတ္တာကို မပါ, ပါအောင် သယ်ခဲ့မယ် ဆိုတာနဲ့ အသက်ဘေးက ဝေးအောင် ပြေးကြရတယ်။ မီးခံသေတ္တာကိုတော့ ချောင်းဦးနားမှာ ဟောင်းလောင်း ပြန်ရတော့မှ ကျောချတဲ့အခါ အိုဓါးပြရယ် အိုဓါးပြရယ်လို့သာ ငိုညည်းနိုင်ရှာတော့တယ်။

မွေးစားသားသမီး ဆိုတာကို ရပ်တန့်ပြန်တော့ အကြီးဆုံး သမီးကြီးရဲ့ သားသမက်အလှည့်ပေါ့။ ရုပ်ချော အရာရှိ အသက်ကလည်း ငယ်ပြန်တော့ ရှင်းလိုက်ရတဲ့ အရှုပ်ထုပ်တွေ ငွေထုပ်ပိုက်ပြီး တောလိုက်လိုလိုက် တောင်လိုက်လိုလိုက်။ မိမိသမီးကြီး မျက်နှာမငယ်ရေး အတွက် စီးပွားရေးပျက်ချင်ပျက်ပါစေပေါ့။ သမီးကြီး ဆုံးသွားမှပဲ တစခန်းရပ်တော့တယ်။ ဒါတောင် အဖိုးအဖွားဆုံးတော့ အမွေဆိုင်ပါ လုပ်ပြီး တရားစွဲမယ် ဘာမယ် ထလုပ်သေးတယ်။

နောက်တယောက်ကတော့ နှစ်ဖက်စလုံးကို ဒုက္ခလှလှပေးခဲ့တာပေါ့။ ဟိုးတောထဲမှာ စားစရာ မရှိလို့ အိမ်မှာ လက်တိုလက်တောင်းရ၊ ကျောင်းလေးဘာလေးလည်း ထားပေးရအောင် ခေါ်လာခဲ့တာ။ သွားတိုက်တံဆိုတာ ဒီလိုတိုက်ရတယ်လို့ လက်ထဲက တိုက်လက်စ မီးသွေးခဲကို ဆွဲယူပြီး သင်ပြပေးခဲ့ရတာ။ ဇွန်းခက်ရင်း ကိုင်တာက ဒီလိုကွ။ ထမင်းစားရင် ဒီလိုပုံ ဆိုပြီး အိမ်က ပုံသွင်းပေးခဲ့တာ။ ရည်ရည်မွန်မွန်ဖြစ်လာတော့ တောင်အိမ် (ဖေတို့ အိမ်က) တွင်ခုံမှာ လုပ်ငန်းသင်ပေးခဲ့တယ်။ လုပ်တတ်ကိုင်တတ်ဖြစ်လာတော့ မဆိုးဘူးရယ်လို့ မှတ်ချက်ပေးကြတယ်။ လုပ်ငန်းကိုင်ငန်းတွေ မျက်နှာလွှဲပေးကြတယ်။

ကျေးဇူးဆိုတာရှိမနေခဲ့ရင် ကျေးဇူးစွပ်စရာမလိုဘူးတဲ့။ ဟုတ်တယ် ကျေးဇူးဆိုတာ မရှိခဲ့ရင်ကောင်းမယ်လို့ တွေးမိတယ်။ အတွင်းရေး အတော်များများ သိသွားပြီးတဲ့နောက် နောက်ကျောက ဓါးနဲ့ထိုးမယ်လို့လည်း ဘယ်သူက ထင်မှာလဲ။ ယုံကြည်ထားပြီးသားမို့ မဟုတ်မဟတ် အကြံတွေနဲ့ ဘ၀ပျက်အောင် လုပ်လိမ့်မယ်လို့ ဘယ်သူ ကြိုသိမှာလဲ။

လုပ်ခဲ့တယ် လုပ်ပစ်ခဲ့ပါတယ်။ အိမ်မှာရှိသမျှ အ၀တ်တထည် ကိုယ်တခုနဲ့ ဆင်းခဲ့ရလောက်အောင် ကို လုပ်ပစ်ခဲ့တာ။ တောင်အိမ်က အခုထိရှိနေတုန်း။ ခြံဝန်းကို ပိုင်းပြီးတော့ ရောင်းလိုက်ကြပါပြီ။ နှစ်ဖက်ဆွေမျိုးတွေ အကုန်စိတ်နာခဲ့ကြတယ်။ ဖေ့ဦးလေးဆို အဲ့ဒီစိတ်နဲ့ သေရာပါ။ ပျက်သွားတဲ့ ဘ၀တွေက အများကြီး။ ဦးလေးတွေဆို အခုထိ ဘ၀ပျက်နေကြတုန်း။ အဲ့ဒီလူကိုတွေ့ရင် အော့နှလုံးနာလွန်းလို့ မျက်နှာကို လွှဲပစ်ကြတယ်။ သူ့ဆီမှာ အဖိုးလေးတို့ ရစရာရှိတာတွေ တပုံကြီးကျန်သေးတယ်။ ဒါတောင်မှ သူက မြို့မျက်နှာဖုံးအဖြစ် ဟန်မပျက် ပြုံးပြုံးလေး နေနိုင်သတဲ့။ လူများနော်….

ယုံကြည်မှုဆိုတဲ့ အတိုင်းအတာက မိတ်ဆွေ သူငယ်ချင်းတွေကြားမှာ အတော်လေး တာသွားပါတယ်။ ပေါင်းသင်းရင်း ကြာရှည်လာတဲ့ ကာလတစ်ခုမှာမှ ဒီယုံကြည်မှုဆိုတာ ဖြစ်တည်လာတာပါ။ ဘယ်သူကမှ တွေ့တွေ့ချင်း ယုံကြည်လိုက်တာလို့ မပြောတတ်သလို၊ ငါ့ကို ယုံကြည်ပါကွာလို့လည်း ပြောကြမှာမဟုတ်ပါဘူး။ ထုံးစံအတိုင်း ကျနော်ကောဆိုရင်တော့ ကျနော်က လူတွေကို ယုံကြည်ခဲပါတယ် (အရင့်အရင် အတွေ့အကြုံတွေအရ ကျနော်ပြောင်းလဲသွားတာပါဆိုတာကို လူတွေကလည်း မယုံကြည်ကြပါဘူး)။ အကြွင်းမဲ့ယုံကြည်အောင်လည်း ကြိုးစားပါတယ်။ ယုံကြည်မိပြီးပြီဆိုလည်း စုံလုံကန်းယုံသွားတတ်လွန်းလို့ ခံရပေါင်းလည်း များပါပြီ။ အသိအစ်ကို တယောက်ပြောသလို တခါခံလိုက်ရတိုင်း ဘ၀သင်ခန်းစာတစ်ခုတိုးတယ်လို့ မှတ်ယူထားပါတယ်။

သူငယ်ချင်းမိတ်ဆွေဆိုတဲ့ လူမှုပတ်ဝန်းကျင် တစ်ခုမှာ အဲ့ဒီယုံကြည်မှုကို ဘယ်လိုတည်ဆောက်ကြမလဲ။ ကျနော့ကို ရော ဘယ်သူတွေက ယုံကြည်ပြီးတော့ ဘယ်သူတွေက မယုံကြည်ကြဘူးလဲ။ ကျနော်က မိတ်ဆွေအရင်းတွေလို့ ဆက်ဆံရင်းနှီးခဲ့သူတွေကရော တကယ်ပဲ ယုံကြည်လောက်ရဲ့လား။ စတဲ့ မေးခွန်းတွေနဲ့ ကျနော် ပိတ်မိနေပြန်ပြီပေါ့………..

ပြီးပြည့်စုံသော ပန်းချီကားတစ်ချပ်ဆီသို.

ဒီစာကိုရေးဖို.ကတိပေးထားတာ ကြာပါပြီ။ ၈လလောက်တော့ ပျော့ပျော့ရှိရော့မယ်။ အကြွေးတင်နေတာကြာပါပကောလား။ နှစ်ကူးရုံးလေးရက်ပိတ်တုန်းကလည်း စနေပြီလားလို.မေးတော့ ဟဲဟဲ မုဒ်မရသေးဘူးလို.ပဲပြန်လိုက်ရတယ်။ ဒီနေ.တော့ စပယ်ရှယ်နေ.အဖြစ် ဒီစာကိုရေးလိုက်ပါတယ်။ သူငယ်ချင်းရေ အကြွေးမကျန်တော့ဘူးနော်ကွာ…..

ကျနော်မှတ်မိပါသေးသည်။ ကျောင်းစဖွင့်တဲ့ဆောင်းတွင်းတစ်ခု ရဲ့ ရက်ကြွင်းများအတွင်းမှာပေါ့။ အဲဒီနေ.က chemical lab ၀င်ရတဲ့နေ. Chemical lab ကကျောင်းအုပ်ကြီး ရုံခန်းအောက်ထပ်မှာ။ ကျနော်နဲ. ကွန်ပြူတာသင်တန်းက သူငယ်ချင်းနှစ်ယောက် ကျောင်းဆောင်တွေ အကူးလမ်းကနေဖြတ်လျှောက်လာပြီးပြန်အလာ။ ဒီကျောင်းပြီးရင် ကျနော်တို.နှစ်ယောက်လုံး နောက်သင်တန်းကိုတက်ရမှာမို. နှစ်ယောက်လုံးမှာ ဖတ်စာအုပ်တွေ မှတ်စုစာအုပ်မျိုးစုံ အပြင် Drawing အချိန်ပါတာမို. T တွေရော Drawing လိပ်တွေရော ရှုပ်ယှက်ခတ်နေခဲ့တာပါ။ အဲဒီနေ.က ကျနော်လွယ်တဲ့ ကျောပိုးအိတ်လေးက အညိုရောင်ဖျော့ဖျော့လေးမှာ အတွင်းကရှုံ့ ကြိုး အပေါ်က သားရေဖုံးလေး။ ဆိုလိုတာကရှုံ့ကြိုးနဲ့မို့ ပုံတွေမကျိုးတန်ကောင်းဘူး ဆိုပြီးအကျထည့်ထားတာ။ လမ်းလည်းရောက်ရော နောက်မှာ အသေအချာပိုးထားတဲ့ Drawingလိပ်က မရှိတော့ဘူးလေ။ လမ်းကိုနောက်ပြန်လျှောက်ပြီး ပြန်လာတော့ လမ်းမှာ မချောနှစ်ယောက်ဗျာ တစ်ယောက်လက်ထဲမှာ ကျနော့ Drawingလိပ်လေးနဲ.။ မချိုမချဉ်မျက်နှာပေးနဲ့ အဲဒီကစလို. ကျနော့ သူငယ်ချင်းမတစ်ယောက်ဖြစ်လာခဲ့တာ ဒီနေ.အထိ။

ဆံပင်တိုတို၊ အသားဖြူဖြူ ထက်ထက်မြက်မြက် သွက်သွက်လက်လက် အားလုံးက သတ်မှတ်ကြတဲ့ ယောက်ျားလေးဆန်ပါလေသော ကျနော့သူငယ်ချင်း။ သူရဲ့ထူးခြားချက် စကားတော်တော်ပြောနိုင်တာပါပဲ။ နင် ကျပမ်းပြိုင်ပွဲ ပြိုင်ရင်နိုင်မှာ သူငယ်ချင်း။ ကျောင်းတက်ခဲ့တဲ့ နှစ်ဦးကာလများမှာ ကျောင်းပြေးကြသည်။ ကမ်းကုန်အောင်ဆော့ကြသည်။ ပြိုင်ဆိုင်ကြသည်။ ရန်ဖြစ်ကြသည်။ မြန်မာစာ စကားပြေတစ်ပုဒ်ကို ကလေးတွေလို အပြိုင်အဆိုင်အော်ကျက်ခဲ့ဘူးသည့် ညနေတစ်ခုကို အမှတ်ရမြဲ။ ကျောင်းရဲ့ ရှပ်အဖြူ ပင်နီဝတ်ပြီး သပိတ်မှောက်ကြသည့်ပွဲတွင်လည်း ရဲရဲတောက်သည့် သူငယ်ချင်းမက ရှေ့ဆုံးက။
မနက်မနက် လိုင်းကားပေါ်မှာ သူငယ်ချင်းတွေအတွက် နေရာဦးတော့လည်း သွက်လက်တဲ့ သူငယ်ချင်းက ဘယ်နှေးလိမ့် မလဲ။ မှတ်မိနေသေးသည့် နောက်တချက်က တစ်ရက် ကားပေါ်မှာ လူကြီးတစ်ဦးနေရာလုနေတော့ သူငယ်ချင်းမကို ဒီတစ်ပတ်ပြတဲ့ ရုပ်ရှင်ဆိုတော့ ချက်ချင်း ရှင်းပြစရာမလိုပဲ နားလည်သဘောပေါက် ခဲ့တယ်လေ။ ရုပ်ရှင်နာမည်က “ အားနွဲ့သူပါရှင်” တဲ့။ အဲလိုမျိုး…

အမြဲတမ်းဆိုးသွမ်းနေကြ ကျနော် နဲ့ သူငယ်ချင်းတို့ စစိတ်ဆိုးကြတဲ့ နေ.။ သူလိုက်တောင်းပန်တဲ့ နေရာက ၄၈ ကားလေး နောက်ဖျားမှာ ထိုင်နေတဲ့ ကျနော့ကို လှည်းတန်း မီးပွိုင့် ကားအရပ်မှာ ဆင်းလာဖို. အခေါ်။ ထုံးစံအတိုင်း စိတ်ဆိုးရင်ချက်ချင်းမပြေတတ်တဲ့ ကျနော်က မဆင်းခဲ့။ နောက်မှစဉ်းစားမိတာက ကားပေါ်မှာလူတွေ အများကြီးနဲ. ကျနော်လိုက်သွားသင့်တာပါ။ အဲလောက်ကိုဆိုးတာ။ နောက်တော့ ပြောမနာဆိုမနာ သူငယ်ချင်းတွေဆိုတော့ ရန်ဖြစ်တဲ့အရေအတွက်က မရေမတွက်နိုင်အောင်ပါပဲ။ ကျောင်းက ပြန်ချိန်အမြဲစောပေမယ့် ကျနော်တို့ သူငယ်ချင်းတွေက အိမ်ပြန်နောက်ကျမြဲ လှည်းတန်း က ရှောက်သီးသုပ်၊ ဆကာကြီးမုန့်ဟင်းခါး ကို ပဲသွေးနဲ့ ဘဲဥ၊ ကြက်တောင်ပံကင်နဲ့ ကြံရည်၊လှည်းကလေးနဲ.ဒိန်ချဉ်သည်ဆိုတာ တစ်ရက်မှမထပ်စေရဘူး။ အင်းလျားဆိုလည်း မရောက်မရှိစေရ။ မအောင်မြင်ခဲ့ပါသော ချောင်းသာ ခရီးစဉ် အိပ်မက်ကိုလည်းတူတူ မက်ခဲ့ကြဘူးသည်။ သိမ်ငယ်ကြောက်ရွံ့မှု အပြည့်နဲ. ထိုင်ခဲ့ရသော ဧည့်ခန်းကိုလည်းမမေ့နိုင်ခဲ့ပြန်။

နောက်နှစ်များမှာတော့ ခရီးတွေထွက် အပြတ်အသတ်ကိုကဲခဲ့ကြတာပေါ့။ ပုဂံဆိုလည်းပါ ငပလီဆိုလည်းလိုက်နဲ. ကျောင်းမှာ အပျော်အပါးဆို မမေးနဲ. အမှတ်စဉ် ၁ နဲ. ၂ မှာနာမည်ကောက်သာရေးလိုက်စိတ်ချ မပျက်ကွက်စေရ။ စာမေးပွဲချိန် မမေးနဲ. ပုဇွန်ကော်ပြန်. သီးစုံ ကော်ပြန့် ငှက်ပျောကော်ပြန့် မချက်ဘူးတဲ့ ဟင်းမျိုးစုံ ကုန်အောင်မီးဖိုထဲမှာ ချက်ကြမယ်။ စာကြည့်စားပွဲဆိုတာ တီဗီက လာတဲ့ ကိုရီးယားရေသန့်ကားလောက် စိတ်ဝင်စားစရာမကောင်းခဲ့။ ထွက်လာတဲ့အောင်စာရင်းမှာ ဘယ်တုန်းကမှ ကျနော်တို့ ထိပ်ဆုံးကမပါခဲ့။ ဒီနှစ်သင်ခန်းစာယူ ပြီး နောက်နှစ်ကြိုးစားမယ်ထင်သလား သူငယ်ချင်းရယ်င့ါကို စိတ်ချမ်းသာအောင်ထားပါ ဆိုပြီး မတွက်ပဲထားခဲ့တဲ့ စာတွေက အများကြီး။ မှတ်မိသေးလား device စာအုပ်ကို မဖတ်ချင်ပါဆိုပြီး ဂျစ်ကျတဲ့ သူငယ်ချင်းရယ်ပါ။ အိမ်အလုပ်ကူမလုပ်လို. ငြိုငြင်တဲ့ နင့်အမေမသိအောင် ကျနော် စာအုပ်ဝယ်ဖတ်တိုင်း ခိုးငှားခဲ့ရတာတွေကလည်းအမှတ်တရ။ စာအုပ်ကို ငှားရင်ကျနော့စာအုပ်တွေ ခေါက်မှာစိုးလို့ ပြောပြန်တော့ တသက်တာမှတ်စရာ အဖြစ်ပြောမဆုံးပေါင်တောသုံးတောင်လုပ်ခဲ့တဲ့ သူငယ်ချင်းပါ။

ကျောင်းပြီးမှသွားဖြစ်ခဲ့တဲ့ခရီးက ကျိုက်ထီးရိုးဘုရားခရီးပေါ့။ အလုပ်တွေကိုယ်စီဝင် ဆက်သွယ်ကြတိုင်ပင်ကြမြဲ လုပ်ငန်းခွင်အခက်အခဲတွေကို ဆွေးနွေးကြမြဲ။ လုပ်ငန်းခွင်က လွှတ်တဲ့ ပြည်ပခရီးစဉ်မှာ လဲ တရုတ်တန်းက အိမ်မပြန်တတ်သော၊ လှည်းတန်းကနေ ဆူးလေကို ၄၅ ကားစီးတာ စွန်.စားခန်းကြီးလိုဖြစ်နေခဲ့သော၊ ၂၀၄ကားပေါ်မှာ ကားကြပ်တယ်ဆိုပြီးငိုခဲ့ဖူးသော သူငယ်ချင်းတစ်ယောက် ဘယ်လောက်အားငယ်မယ်ဆိုတာ ငါနားလည်ပါတယ်။

နောက်တော့လည်း စွန့်စားခန်းခရီးရှည်ကြီးတစ်ခုကို နင်စလုပ်ခဲ့တယ်။ သွားပါလို. တိုက်တွန်းမိခဲ့တယ် ထင်ပါတယ်။ ပုံစံအမျိုးမျိုးသောလူတွေကြားထဲမှာ မိဘအိမ်လိုမျိုး အခန်.သင့် ခြင်ထောင်ထောင်ပေးမယ့်လူမရှိ၊ အ၀တ်လျှော်ပေးမယ့်လူမရှိဘူးလေနော်။ နင်ကြုံခဲ့ရတာတွေ ကြုံတွေ.နေရတာတွေ က နင့်ကိုပိုရင့်ကျက်စေခဲ့မှာပါ။

အခုတော့ ဘ၀အတွက်လက်တွဲဖော်ကိုပါ ရယူပိုင်နိုင်သွားပြီဆိုတော့

သူငယ်ချင်းရေ ၀ိုင်တစ်ခွက်နင်မတိုက်ပင်မယ့်

Cheers!!!!!!!!

တိမ်တောက်ချိန်ရောက်မှ ဓာတ်ပုံရိုက်ရင် လှမယ့် နင့်ရဲ့ဆိုးဖော်ပေဖော်တေဖော် သူငယ်ချင်းတစ်ယောက်မှ နင့်ရဲ့ ပြီးပြည့်စုံတော့မယ့် ဘ၀ပန်းချီကားတစ်ချပ်အတွက် အမှတ်တရ……..

စာကြွင်း။ ဒီစာကိုရေးပေးတာ ကျေးဇူးတင်တယ်ဆိုရင် အစ်မလှလှလေး ငါ့ကိုပေးလေဟာ။ ဒါပေမယ့် အိပ်ပုတ်တော့ ကြီးတယ်နော်။ ထားပါလေ ငါပဲအနစ်နာခံလိုက်ပါမယ်။ ပေးနော်........