ဘူတာရုံ အရောင်များ

စာရေးဆရာမတစ်ယောက်က ရေးဖူးတယ် မြေအောက်ဘူတာရုံတွေကြောင့် ပတ်ဝန်းကျင်မြင်ကွင်းတွေကို ကြည့်ဖို့ အခွင့်အလမ်းဆုံးရှုံးသွားရသတဲ့။

မနေ့က တွေးနေမိခဲ့တယ်။ မြေအောက်ဘူတာရုံရဲ့ အပြင်အဆင်တွေကိုကော ကျနော် သတိထားကြည့်ခဲ့ဖူးပါသလား။

အင်္ဂလိပ်စာသင်တန်းတစ်ခုမှာ လေ့ကျင့်ခန်းတစ်ခုလုပ်တဲ့အကြောင်းလေး အမှတ်ရမိသေးတယ်။ မေးခွန်းလေးတစ်ခုပါ မင်း ခရီးသွားရင် (ကား၊ ရထား ဒီနှစ်ခုက လူသုံးများတယ်) ၁။ မင်းစာဖတ်လေ့ရှိသလာ;။ ၂။ မင်းသီချင်းနားထောင်သလား ၃။ ပတ်ဝန်းကျင်ကို ကြည့်သလား။ ၄။ ဒါမှမဟုတ် မင်းအိပ်သလား။ ကျနော်တို့အားလုံးရဲ့ အဖြေက ဘယ်နံပါတ်မှာ များမယ်ထင်သလဲ။

စတင် သတိထားမိတာက အ၀ါရောင်ဘူတာရုံပါ။ ဘူတာရုံတစ်ခုလုံး အ၀ါရောင်သုတ်ထားခဲ့တယ်။ ဘာကြောင့်လဲ ဘာအတွက်လဲ ဒီအရောင်နဲ့ ဒီဘူတာရုံ ဘယ်လိုစပ်ဆက်သလဲ။ ဘူတာရုံ အ၀ါရောင်မှာ ကျနော်ဘယ်လိုခံစားမိခဲ့သလဲ။ ကျန်တဲ့သူတွေကော ဘယ်လိုခံစားမိသလဲ။ ကျနော်သိချင်မိတယ်။

ဒုတိယဘူတာရုံကတော့ အစိမ်းရောင်ဘူတာရုံပါ။ သူ့ကို အစိမ်းရောင်သုတ်ထားမထား ကျနော်မသေချာပေမယ့်။ ကျနော့စိတ်ထဲမှာ အစိမ်းရောင်လို့မှတ်ထားမိခဲ့တယ်။ အစိမ်းရောင်ဘူတာရုံကို မီးခိုးရောင်ကောင်းကင်နဲ့ ကြည့်ရတာ တစ်မျိုးတော့အဆန်းသား။

နောက်ထပ်မှတ်မှတ်ရရဖြစ်စေခဲ့တာ အဖြူရောင်ဘူတာရုံပါ။ သူ့ကိုတော့ ကျနော်သိပ်ကြိုက်တဲ့ လသာဆောင်လေးကနေ ထိုင်ကြည့်ဖြစ်ခဲ့တာ။ လူတွေ ရထားတွေ ၀င်လိုက်ထွက်လိုက်လုပ်နေသလို ကျနော့ကိုလည်း အတက်အကျခံစားမှုတွေ ပေးခဲ့တယ်လေ။ အဖြူရောင်ဘူတာရုံလေးက မိုးရေတွေကြားမှာ လွမ်းနေအောင် အချွဲပိုသွားခဲ့သေးတယ်။ ကျနော်လည်းချမ်းနေခဲ့တယ်။

ရထားသံလမ်းဘေးမှာ ရပ်နေရင်း စိတ်အာရုံတွေပျံ့လွင့်နေခဲ့တယ်။ တစ်စင်းပြီး တစ်စင်းဖြတ်သန်းသွားကြတဲ့ ရထားတွေကို တိုးသွားတဲ့လေအဟုန်နဲ့ တိုက်သွားတဲ့ လူတွေကြောင့်သာ သတိထားမိတယ်။

ကျနော့စိတ်ကတော့ အုတ်ခဲကျိုးရောင် ဘူတာရုံလေးမှာ ကျကျန်နေခဲ့တာ။

(ရောက်တတ်ရာရာ လျှောက်ရေးတာပါခင်ဗျာ..ပေါက်တတ်ကရတွေ တွေးကြဖို့ပါပဲ)