ရထားတစ်စင်းဖြစ်ခဲ့ရင်

တနေ့က မရောက်တာကြာပြီဖြစ်တဲ့ အဲ့ဒီဘူတာကို ရောက်ခဲ့တယ်။ ကျနော့်အထင် ခြောက်လနီးပါးလောက် ရှိပြီ။

လွန်ခဲ့တဲ့ ခြောက်လမတိုင်ခင်ကပေါ့…..
ရောက်တဲ့အခေါက်တိုင်း အေးအေးဆေးဆေးနေမှ ရထားပေါ်က ဆင်းတယ်။ လူတွေအားလုံးရှုပ်ယှက်ခက်နေကြမို့ပါ။ ဘူတာအစ ဖြစ်သလို ဘူတာအဆုံးလည်းဖြစ်နေတာကိုး။ တစ်ချို့ကလည်း ခရီးရှည်မှာမို့ ထိုင်စရာနေရာတစ်ခုအတွက် ပတ်စီးကြသတဲ့။ တစ်ချို့ကလည်း အိပ်ပျော်နေကြတယ်တဲ့။ ဂိတ်ဆုံးစီးမယ်ဆိုပြီး စိတ်လျော့ထားဟန်တူပါတယ်။ စီးသူကစီး တက်သူကတက် ဆင်းသူကဆင်းရယ်နဲ့မို့ လူသိပ်များလွန်းတယ်။ ဒီဘူတာဘက်မှာ နေထိုင်ဖို့ဆို အဲ့ဒီအချက်တစ်ခုနဲ့ ငြင်းပယ်ဖြစ်မယ်ထင်တယ်။

ဘူတာအစလည်းဖြစ်ပြန် အဆုံးလည်းဖြစ်ပြန်ဆိုတော့ ဘယ်ဘက်လမ်းကပဲဖြစ်ဖြစ် ညာဘက်လမ်းကပဲဖြစ်ဖြစ် ပြန်ထွက်မယ့် ရထားတွေချည်း။ အချိန်မရတဲ့သူတွေက အရင်ထွက်မယ့် ရထားကို သုတ်သီးသုတ်ပြာ တက်လိုက်ရုံပဲ။ အချိန်ရတယ် နေရာလိုသ,ပ ဆိုသူတွေတော့ နောက်တစ်ခေါက်ထွက်မယ့် ရထားကိုလိုက်ရုံပေါ့။ ရထားမှားပြီး စီးစရာလည်း မရှိတော့ဘူးလေ။ စင်္ကြန်ရဲ့ ဘယ်တက်တက် ညာတက်တက် ခရီးစဉ်တူချည်းပဲ။

မနေ့က
မနေ့က အိမ်မှ လူကြုံပေးလိုက်တာ အဲ့ဒီဘူတာနားမှာမို့ မရောက်တာကြာတဲ့ ဘူတာကို ပြန်ရောက်ဖြစ်ပြန်ရော။ ဒီတစ်ခေါက်တော့ ဟိုယခင်တွေနဲ့မတူတော့။ ဒီရထားက ဆက်လက်ထွက်ခွာပါမယ်တဲ့။ နောက်ဆုံးဘူတာမဟုတ်တော့ပြီတဲ့လေ။ အိုး….ဟုတ်ပါရဲ့ ဒီရထားလမ်းကို နောက်ထပ်တိုးချဲ့ထားတာကိုး။ လမ်းညွှန်ဆိုင်းဘုတ်တွေလည်း ပြုပြင်ပြောင်းလဲပြီးသွားပြီပဲ။ အရင်လို စိတ်ချလက်ချ အိပ်ငိုက်လို့ မရတော့ဘူးထင်တယ်။ ပြီးတော့ ညာဘက်က ဆက်သွားမယ့်ခရီးဆို ဘယ်ဘက်က ဆန့်ကျင်ဘက် ခရီးတစ်ခု ဖြစ်နေခဲ့ပြီ။ လက်လွတ်စပယ် တက်သွားလိုက်လို့ကတော့ လားရာတွေမှားယွင်း နိုင်နေပြီ။ ကိုယ်သွားမယ့် ခရီးနဲ့ ဆိုင်ရာ ဘက်ကို သတိထားသွားရတော့မှာပါလား။

အတွေး
ဘူတာလေးတစ်ခုရဲ့ ပြောင်းလဲခြင်းကို ကျနော်လိုက်စဉ်းစားမိတယ်။ လမ်းဆုံးလို့ ကျနော်တို့ သတ်မှတ်ထားတဲ့ အရာတွေ အဲ့လိုပဲ ပြောင်းလဲတတ်ပါသလား။ အချိန်ကာလတစ်ခုရယ် အခြေအနေ အကြောင်းအရာတွေရယ်နဲ့ လိုက်လံပြောင်းလဲတတ်တဲ့ ပြောင်းလဲမှု ဘယ်နှစ်ခုကို ကျနော်ကြုံတွေ့ရနိုင်မလဲ။ ပြောင်းလဲမှုတိုင်းအတွက် သတိတရား ကျနော့မှာရော အမြဲရှိနိုင်ပါ့မလား။ အသိလက်လွတ်လို့ လမ်းမှားသွားခဲ့ရင်ရော။ ရထားမှားစီးသွားရင်တော့ ပြန်ဆင်းပြီး အမှန်စီးလို့ လွယ်ပါတယ်။ အချိန်ကုန်သွားမှာတစ်ခုပဲ။ ဘ၀ရဲ့လမ်းဆုံတစ်ခုမှာ မှားယွင်းတဲ့ လမ်းကို ရွေးချယ်မိရင်ကော ဘယ်လောက်ဆုံးရှုံးသွားနိုင်သလဲ။ ဟူး………….

ရထားတစ်စင်းဖြစ်ခဲ့ရင်…..

ကိုယ်တိုင်လည်း လမ်းကြောင်းမှန်ပေါ်မှာ မောင်းနှင်ချင်သလို….

ကိုယ်နဲ့ ပတ်သတ်နေတဲ့ ရင်းနှီးချစ်ခင်မိသူတွေကိုလည်း ခရီးမှန်ကို လိုက်ပို့ပေးချင်တယ်…

ရထားတစ်စင်းဖြစ်ခဲ့ရင်ပေါ့………