ဧည့်ခန်းဆောင်ထဲက ခံစားချက်

အသံတွေတိတ်ဆိတ်လို့………………………………………………………………………………….

တခါတလေ ကြားရပါလိမ့်မယ် တိုးတိုးတိတ်တိတ်ကြားက နီးလာလိုက် ဝေးလာလိုက် ခပ်ဖွဖွခြေသံတွေ။ တစ်ချက်တစ်ချက်လည်း ပွတ်တိုက်သွားမိမလိုလို။ ဒါပေမယ့် ငါတစ်ယောက်တည်းရယ်ပါလေ..

ဒီဧည့်ခန်းဆောင်မှာ ရောက်နေတာကြာခဲ့ပါပြီ။ ကိုယ်တိုင် ဟန်တွေဝံ့ မာန်တွေတင့်ပြီး အခန့်သားလာ ထိုင်နေတာတော့ မဟုတ်ပါဘူး။ မြတ်မြတ်နိုးနိုးလေးလေးစားစား အသွင်နဲ့ ဒီနေရာမှာ လာချထားခဲ့တာ။ ငွေကြေးနဲ့ မဟုတ်ပေမယ့် ဧည့်ခန်းဆောင်မှာ ထားဖို့ တစ်ခုခုတော့ အားထုတ်ခဲ့ရမှာပါ။ ယုတ်စွအဆုံး လက်ကလေးတွေတော့ လှုပ်ရှားရမှာပေါ့။

အခုတော့….

ဒူးနေရာ ဒူး တော်နေရာတော် ဆိုတာသိပါတယ်။ ဒါပေမယ့် ဧည့်ခန်းဆောင်ထဲမှာ ငုတ်တုတ်မေ့ရမယ့် အရာထက် ဧည့်ခန်းဆောင်ထဲကို ၀င်ခွင့်မရတဲ့ အရာတစ်ခု၊ ဒါမှမဟုတ် ဧည့်ခန်းဆောင်လှပရေးမှာ တံမြက်စည်းလေးဖြစ်ဖြစ် ခြေသုတ်ဖုံလေးဖြစ်ဖြစ်၊ ကြက်မွှေးလေးပဲဖြစ်ဖြစ် ဖြစ်ချင်နေမိတယ်။

ဧည့်ခန်းဆောင်ထဲကို ၀င်ခွင့်မရခဲ့ရင်လည်း အကောင်းလေ။ တန်ရာတန်ရာပေါ့။ အဝေးက ဧည့်ခန်းလေးကို ငေးရင်း ဖြေသာနိုင်မှာ သေချာပါတယ်။

ဧည့်ခန်းဆောင် အသုံးချခံပစ္စည်းတစ်ခုဆိုရင်လည်း ကျေနပ်မိမှာပါပဲ။ အနည်းဆုံး ကိုယ်ဟာ အသုံးဝင်ခဲ့တယ်ပေါ့။ ပြက္ခဒိန်ဆိုလည်း သူ့အရွက်တွေ ဆုတ်ဖြဲခံနေရရင်တောင် ကျေနပ်မိမှာပါပဲ။ သူ့ကိုစောင့်ကြည့်တဲ့ သူရှိတယ်လေ။

ဒါပေမယ့် တစ်ခုတော့ ပြောနိုင်ပါတယ်။ ဧည့်ခန်းထဲဝင်လာတဲ့သူတွေ မြင်နိုင်သားလို့။ တစ်ယောက်ယောက်တော့ ကြည့်မိပါလိမ့်မယ်။ ဟုတ်ကောင်းဟုတ်ပါလိမ့်မယ်။ တစ်ယောက်ယောက်ကို ဘယ်အချိန်ထိစောင့်ရမလဲ။

ပြီးတော့ ခန်းနားကြီးကျယ်တဲ့ ဧည့်ခန်းဆောင်ထဲမှာ တန်ရာတန်ဖိုး ကြီးတဲ့ အရာတွေကလည်း အဆောင်ဆောင်တခမ်းတနား။ ရွှေ ရွှေချင်းထပ်မြတ်၊ နေနဲ့လ ရွှေနဲ့မြတွေ ရဲ့ကြားမှာ ကိုယ်က အနေစုတ်ပေမယ့် ရွှေထုပ်တဲ့ မြပုဝါရယ်လို့ ပြောရဆိုရအောင်လည်း မဟုတ်။ မရဲတရဲ ချောင်းကြည့်နေရတဲ့ ကိုယ့်အဖြစ်မို့ ကိုယ်ဟာကိုယ် အားငယ်တယ်လည်းဆိုပါတော့။

တကယ်တမ်းက ဧည့်ခန်းဆောင်ထဲမှာ တင်ထားခံရတာ ကိုယ့်အတွက် စင်ပေါ်တင်ပြီး အလှောင်ခံရသလိုပါပဲ။ ဒေါင်းတွေအလယ်က ကျီးတစ်ကောင်လို ရှက်ရွှံ့မှုတွေနဲ့ပေါ့။ ဒေါင်းတွေ ပဲကြည့်နေကြဆို ဒေါင်းတွေနဲ့ပဲ ပြည့်စုံစေသင့်တယ်။ ကျီးတစ်ကောင်ကို ဟာသအဖြစ် တင်ထားခဲ့တာလား။ ကျီးဟာကျီးပါပဲ ဒေါင်းယောင်ဆောင်လို့မှ မဖြစ်နိုင်ပဲနော်။

တောင်းဆိုခွင့်ရှိမယ်ဆိုရင် တစ်ခုပဲအနူးအညွှတ် တောင်းဆိုချင်ပါတယ်။ ဒီလောက်ကြီးကျယ်ခမ်းနားတဲ့ ဧည့်ခန်းဆောင်ထဲမှာ မနေရပါရစေနဲ့။ ချောင်ကွယ်မှာဖြစ်ဖြစ် မှောင်တယ်ပဲဆိုဆို ဒီဧည့်ခန်းဆောင်နဲ့ဝေးပါရစေ။