ပုံပြင်အသစ်

ဟိုးတစ်ခါတုန်းကတဲ့

လူတစ်ယောက်က သူ့ဘ၀မှာပျင်းရိငြီးငွေ့လှတယ်လို့ နေ့တိုင်း ညည်းညူသတဲ့။ သူ့ညည်းညူသံကိုကြားတော့ လူတစ်ချို့က စာချိုးတစ်ပုဒ်ကို ၀ိုင်းရေရွတ်ကြတယ်။ အဲ့ဒီအချိန်တုန်းကတော့ မကြားသလိုကြားသလို သူမသိချင်ယောင်ဆောင်နေခဲ့တာပေါ့။

နောက်တစ်နေ့မှာတော့ သူ့ရဲ့ အိမ်ကလေးအနားမှာ သူဟာအလုပ်ရှုပ်နေခဲ့တယ်။ သူဘာတွေလုပ်နေခဲ့တာလဲ။

မနက်တိုင်းစောစောထနေတတ်ခဲ့တယ်။ အိမ်လေးနားဝန်းကျင်မှာ သူဟာ အရိပ်တကြည့်ကြည့်ပေါ့။ နေရောင်လာလို့ တော်တော်လေးပူမှ သူဟာ အိမ်လေးထဲကို ပြန်ဝင်သွားတော့တယ်။

ရက်ကလေးနည်းနည်းရတော့ မိုးအလင်းမှာ မြေပြင်က အညှောင့်ပြူစ အရွက်ကလေးနှစ်ရွက်ကို မထိရက်မတို့ရက် စိုက်ကြည့်နေတာ တွေ့ကြရပါရောလား။ တိုက်လာတဲ့ လေပဲ ပြေးကာရ,မလို တက်လာတဲ့နေပဲ ဆွဲချရမလို ဟိုလှုပ်လှုပ်ဒီလှုပ်လှုပ် ဖြစ်နေတာတော့ မျက်စိနောက်ကျတာပါပဲ။

အဲဒီရက်ကစလို့ သူ့အိမ်နားမှာ ပျင်းတယ်လို့ ညည်းညူသံမကြားတော့ဘူးဆိုပဲ။

နေထွက်မိုးချုပ် တကုပ်ကုပ်ကို အဲ့ဒီ အရွက်ကလေးတွေကို ပြုစုစောင့်ရှောက်နေတော့တယ်။ လေတိုက်လို့ အရွက်ကလေးတွေလှုပ်ရင် သူ့ကိုတီးတိုးစကားဆိုတယ်ဆိုပြီး ကြည်နူးလို့။ သူအထင် သူ့ကို ချစ်တယ် ချစ်တယ်လို့ တဖွဖွပြောနေသလိုပဲ။ တတ်လိုက်တာ ပျိုးရကျိုးနပ်ပဟဲ့ ဆိုပြီး ပတ်ဝန်းကျင်တစ်ခုလုံးကို ထီမထင် မျက်လုံးနဲ့ ကြည့်နေတော့တာပေါ့။

တဖြည်းဖြည်းကြီးရင့်လာတော့ အရိပ်လေးတော့ ခိုရနိုးနိုး၊ အသီးလေးတော့ စားရနိုးနိုး၊ အရွက်ကလေးတော့ မြေသြဇာဖြစ်စေမယ် ရည်ရွယ်မိသတဲ့။

ဒါပေမယ့် ဗြုန်းဆို သစ်ပင်လေးရဲ့ ပိုင်ရှင် အသစ်ရောက်လာတော့တာပါပဲ။ ဒီသစ်ပင်လေးကိုရဖို့ မျိုးစေ့တစ်ခုရှိရမယ်တဲ့။ အဲ့ဒီမျိုးစေ့က သူ့ရဲ့ သစ်ပင်ကြီးဆီက ပဲဖြစ်နိုင်တယ်။ ဒီပတ်ဝန်းကျင်တစ်ခုလုံးမှာ မျိုးစိတ်ခြင်းတူတာလည်း သူတို့နှစ်ပင်တည်းဖြစ်နေပြန်တယ်။

တစ်ယောက်တည်း လူမှာ ဘာပြောရမလဲ။ ချက်နဲ့လက်နဲ့ မျိုးနဲ့ရိုးနဲ့ ဆိုတော့ ငြင်းခွင့်မသာတော့ဘူးတဲ့။ မျက်ရည်လည်ရွှဲလို့ တစိမ့်စိမ့်ရယ်ပျိုးခဲ့တဲ့ အပင်ကလည်း စိမ်းစိမ်းရယ် ကြည့်ပြန်ကော။ လက်ပြလို့ နှုတ်ဆက်လွယ်တယ်လေ တူရာတူရာမှာ ပျော်ရှာပေမပေါ့။

နောက်တစ်နေ့ကစလို့ အဲ့ဒီအိမ်လေးထဲက ဘာသံမှမကြားရတော့ဘူး။

တကယ်တော့ သူကတိုးတိုးတိတ်တိတ် ကျိန်စာတွေ ရွတ်နေခဲ့တာ။

သူရွတ်နေတဲ့ကျိန်စာက သူ့ကိုစာချိုးလေး ရွတ်ပြခဲ့တဲ့ ပတ်ဝန်းကျင်ကလူတွေအားလုံး ကို။ ပြီးတော့ ပတ်ဝန်းကျင်တစ်ခုလုံးကို။

နီနေတဲ့ မြေတွေ ပတ်ကြားအက်လာခဲ့တယ်။ မိုးရွာတယ်ဆိုတာ ဘယ်တော့မှ မကြားရတော့ဘူး။

အဲ့ဒီအိမ် ၀န်းကျင်တစ်ဝိုက်မှာ ဘယ်တော့မှ သစ်ပင်စိုက်လို့ မရတော့ဘူး။

ပြီးတော့ ကြေကွဲစိတ်နဲ့ တစ်ယောက်တည်းသမားကိုလည်း ဘယ်တော့မှ မတွေ့ရတော့ဘူးတဲ့။

ဘာရယ်မဟုတ်ပါဘူး ပေါက်တတ်ကရ အတွေးလေးကို ချရေးကြည့်တာပါ။