ရနံ့တစ်ခု၌ မူးယစ်ခြင်း

လူတိုင်း လူတိုင်း ကြိုက်နှစ်သက်တဲ့ အနံ့ဆိုတာ ရှိတတ်ကြမှာပါ။ ဒါပေမယ့် ကိုယ်မုန်းတီးတဲ့ အနံ့အသက် ဆိုတာလည်း ရှိတတ်ကြမှာပါလေ။

အဲ့ဒီကြိုက်နှစ်သက်တတ်တဲ့ အနံ့တွေထက် မုန်းတီးမိတဲ့ အနံ့တစ်ခု ကို အခုအချိန်ထိ စွဲလမ်းမူးယစ် မိခဲ့တာကကော…………..

ပထမဆုံး အဲဒီအနံ့ကို မုန်းတီး သည်ထက် မုန်းတီးအောင် အစပြုခဲ့တဲ့သူက အဘွားလေးပါပဲ။ အဘွားလေးက ကြေးကွမ်းအစ်စုံကြီးရှေ့ချပြီး တစ်ယာပြီးတစ်ယာ စားနေခဲ့တာ ဆုံမညောင်းတဲ့အတိုင်း။ သူကြိုက်လို့သူစားတာပေမယ့် ကျနော်မကြိုက်တတ်ဘူးဆိုတာ သိတော့ လာစမ်းခလေးဆိုပြီး ကျနော့ကို ဖက်နမ်းရင်း ပါးစပ်ထဲကို အတင်းထည့် ကျနော်ကလည်း တစ်အားထွေးထုတ် မြေးအဘွားနှစ်ယောက် လုံးနေကြလေ။ သားမကြိုက်ပါဘူးဆို လို့ပြောလည်း ဟဲဟဲ ငါ့မြေးကလည်း စားကောင်းပါတယ် မွှေးတောင်မွှေးသေးနဲ့ အမြဲလုပ်နေကြ။ ကွမ်းစားနေကြမို့ သူ့ပါးစပ်ဟလိုက်ရင် ကွမ်းနံ့ကထောင်းကနဲလေ။ ခပ်ဝေးဝေးကနေ စကားပြောဖို့ ကျနော်အမြဲကြိုးစားနေကြ။ ဒါပေမယ့် မရပါဘူး ဘွားလေးက နားနည်းနည်းလေးတာမို့ ရှေ့တိုးရင်းတိုးရင်း ခန္တီစရတော့တာပေါ့။ အခုနေ ပြန်တွေးကြည့်တော့ အဲဒီတုန်းကများ ယဉ်ပါးခဲ့လေသလားလို့။

ကောင်မလေးကိုတွေ့တော့ ဖြူတူတူ လုံးတုံးတုံးလေးမို့ ချစ်စဖွယ် ထင်မိတယ်။ ကရင်မလေးလားလို့မေးတိုင်း ဟုတ်ပါဘူးရယ် ဖြေတတ်တယ်။ ပါးလေးဖောင်းနေတာလည်း တစ်မျိုးလေးလို့ ထင်ခဲ့တာ။ နှုတ်ခမ်းလေးရဲတာလည်း အသားရယ်ဖြူတာကြောင့်လို့ ကောက်ချက်ဆွဲခဲ့မိတယ်။

ကောင်မလေးလက်ကို ဆွဲတော့မှ လက်ထဲက ပလတ်စတစ်ထုပ်ကို တွေ့တော့တာကိုး။ လားလား ကောင်မလေးက ကွမ်းစားသူတစ်ယောက်ပဲကော။ အခုအချိန်မှ ကျနော်ဘာပြောရမလဲ။ ဒါဟာ အကြောင်းပြချက်ကောင်းတစ်ခုမဟုတ်သလို ကျနော့အတွက် (ခိုင်မာတဲ့ ဆုံးဖြတ်ချက်ချတတ်တဲ့ သူတစ်ယောက်အတွက်) ပြန်လည် ပြုပြင်ပြောင်းလဲဖို့ လုံးဝမဖြစ်နိုင်တော့ဘူး ဆိုတာ သေချာနေခဲ့ပြီ။

ဒီတစ်ခါကော ကျနော် ခပ်ဝေးဝေးက နေဖို့ ကြိုးစားသင့်ပါသလား….

ကောင်မလေး စကားပြောပြီဆို ကွမ်းတံတွေးလေးတွေက နှုတ်ခမ်းစွန်းထက်မှာ ရိပ်ရိပ်လေးစွန်းတတ်တယ်။ သူများတွေလို တပျစ်ပျစ်မထွေးတတ်တာကိုက ကျနော့အတွက်တစ်မျိုး။ အ၀တ်အစားတွေ မစွန်းတာပဲ တော်လှပြီလေ။ ပတ်ဝန်းကျင်ကို ချစ်မြတ်နိုးသူတစ်ယောက်မို့ သူမကိုယ်တိုင်က တတ်နိုင်သလောက် ထိန်းသိမ်းစောင့်ရှောက်ပေးတာကိုပဲ ကျေးဇူးတင်ရမှာပါပဲ။

အနားမရောက်ခင် အာမွှေးဆိုလား ဆစ်ဂနယ်ဆိုလား အနံ့တစ်ခုက အရင်ရောက်လာစမြဲ။ ဒါဆို နောက်လှည့်ကြည့်စရာမလိုဘူး ကောင်မလေးလာနေပြီလေ။ ပြီးတော့ ပြီးတော့ နှုတ်ခမ်းချိုချိုလေးတွေနဲ့ သမဆိုင်က ပစ္စည်းထုတ်သလို တွဲလျက်ပါလာတဲ့ အဲ့ဒီ ကွမ်းနံ့လေးတွေ။

ကောင်မလေးရယ် မတွေ့ခင်မစားပါနဲ့လားကွယ်ဆိုလည်း ဟင့်အင်း မနေနိုင်ဘူးတဲ့လေ။ တတ်နိုင်တာတော့ သွားလေးတွေ ဖွေးနေအောင် ပုံမှန်ဂရုစိုက်မယ်တဲ့။ ကောင်မလေးကတိတည်သား။ ကွမ်းချိုးတွေ မတက်အောင်တော့ ကြိုးစားရှာတယ်။

တစ်ခါသား ကွမ်းဖြတ်မယ်ဆိုတော့ ကျနော့မှာ ဖြူလေးပြာလေးခါအောင် ကွမ်းအစားထိုးတွေ City Mart ကနေ တပွေ့တပိုက်ဝယ်ပေးခဲ့တယ်။ ပူရှိန်းက တစ်မျိုး ၊ ချိုချဉ်က တစ်ဖုံ၊ ငုံဆေးဆိုတာလည်း မကျန်။ တစ်ပတ်လား နှစ်ပတ်လားခံပါတယ်။ နှုတ်ခမ်းထောင့်မှာ သွေးနီနီစွန်းပြန်ပါရော။

လူ့ဘ၀ဆိုတာလည်း ဆန်းကြယ်သား။ ကောင်မလေးလည်း ဖြူပါရဲ့။ ကွမ်းတံတွေးလည်း ရဲပါရဲ့။ ဒါပေမယ့် ကျနော်တို့ လမ်းခွဲခဲ့ရတယ်။ ဒါပေမယ့် ကွမ်းစားခြင်းဆိုတဲ့ အကြောင်းကြောင့် တော့ မဟုတ်ပါဘူး။

အခုလည်း အဝေးတစ်နေရာစီကို ရောက်နေခဲ့ပြီ။ ကောင်မလေး ကွမ်းစားတုံးပဲ ထင်ပါရဲ့။ လွမ်းစရာတွေ ထောင်ချီအောင်ရှိပေမယ့် တကယ်မက်မက်စက်စက် လွမ်းနေမိတာက အဲ့ဒီ ကွမ်းနံ့။ ချိုမြခြင်းရဲ့ နောက်ကွယ်က ကွမ်းနံ့တစ်ခုကို မူးယစ်စွာတမ်းတ နေမိတယ်တဲ့လေ။

ဖြစ်နိုင်ရင်………အင်းဖြစ်နိုင်ရင်ပေါ့ ကွမ်းယာနံ့လေး ပြန်ရချင်မိတာ ရူးတယ်ပဲ ခေါ်မလား……

ငါ့နှယ်နော်......


စနေနေ့က ကွမ်းစားတဲ့ ကွမ်းကြိုက်တဲ့ မိန်းမပျိုတစ်ယောက်ကိုမြင်ပြီး ဒီအတွေးစကိုရပါတယ်။ ထုံးစံအတိုင်း စိတ်ကူးယဉ် ပေါက်တတ်ကရဇာတ်လမ်းလေးတစ်ပုဒ် သက်သက်ရယ်ပါ။

ပုံကကြိုက်လို့ထည့်လိုက်တာပါ။ သူများစုံတွဲပုံ ရိုက်ထားပါကြောင်း (ဝေဖန်ရေး ကြိုကန်ထားပါသည်ခင်ဗျာ)