နေ့လည်စာစားပြီးတာနဲ့ နီဂွန်ဘိုဆိုတဲ့ နောက်ထပ်ကမ်းခြေတခုကို ဦးတည်လာကြတယ်။ ကိုလံဘိုနဲ့ မနီးမဝေး လေဆိပ်နဲ့ မိနစ်နှစ်ဆယ်အဝေးဆိုတော့ ဒီကမ်းခြေဟာ ခရီးစဉ် အဆုံးသတ်သူတိုင်းရဲ့ တညနားခိုရာပါပဲ။
နီဂွန်ဘိုမရောက်ခင် လမ်းမှာ ကာကာဝင်ဆွဲကြသေးတယ်။ အဆောက်အဦးပုံစံ ကြည့်ရင် အနောက်တိုင်းများ ရောက်နေသလားပါပဲ။ ဝန်ထမ်းနဲ့ ဆားဗစ်ကတော့ အတူတူူပါပဲ လူများပြီးပွဲမစည်တဲ့ ဆိုင်ပါ။ မှာတာရော ပိုက်ဆံရှင်းတာရော အတော်လေးကြာပါတယ်။
ကော်ဖီသောက်ပြီးတာနဲ့ ဟိုတယ််ကိုတန်းပို့တယ်။ ခရီးရှည်တောက်လျှောက်မို့ ဘယ်မှ ထပ်မသွားချင်တော့ပဲ ဒီနေ့ကိုတော့ ကောင်းကောင်း အနားယူကြမယ်။ လင်္ကာဒီပက ဟိုတယ်တွေဟာ တခုခုတော့ တခုခုပဲ။ အခန်းဘွတ်ကင် တင်ထားတာကို မပေးပဲ သူတို့ ပေးချင်တဲ့ အခန်းကို ပေးတယ်။ ဟိုတယ်က အိမ်လိုလို အဆောင်လိုလိုပါ။ အခန်းကတော့ သုံးယောက်ခန်းမို့ အတော်လေးကို ကျယ်ပါတယ်။ ရေချိုးခန်းတခန်းတင် ကျနော့အိပ်ခန်း တခန်းစာလောက်ရှိမယ်။
ညနေ နေစောင်းတာနဲ့ နီဂွန်ဘို ကမ်းခြေကို ရေသွားကူးကြတယ်။ ဟိုတယ်လမ်းကြားထဲကနေ လမ်းမပေါ်ကို ဖြတ်ပြီး ဖိုက်စတား ရီဆော့တွေရဲ့ နောက်ကို လျှောက်သွားရင် ကမ်းခြေကို ရောက်တယ်။ ကမ်းခြေမှာ ရေကူးတဲ့သူ ဆော့ကစားနေတဲ့ သူတွေနဲ့ အပြည့်။ စပိဘုတ်တွေကို ရေထဲကနေ သဲသောင်ပေါ်အထိ အရှိန်နဲ့ ထိုးတက်တာကို တအံ့တဩကြည့်ငေးကြရတယ်။
လမ်းတဖက်ကို ပြန်လာတော့ လမ်းထိပ်က စားသောက်ဆိုင်မှာ စနည်းနာတယ်။ ဆိုင်ခပ်သေးသေးလေးပဲ စားတဲ့သူက ကျနော်တို့ပဲရှိတယ်။ ဂဏန်းထပ်စားချင်တာနဲ့ မှာတယ်။ အသွားတုန်းက မေးထားတာမို့ ချက်တဲ့သူလည်း သူတယောက်တည်းပဲဆိုတာ သိရတယ်။ ခပ်ပြည့်ပြည့် အပြုံးချိုချိုဆိုတော့ ယုံယုံကြည်ကြည်နဲ့ ထိုင်စောင့်ကြတယ်။ တကယ်တမ်း ဟင်းတွေလာတဲ့အခါ တကယ့်ကို အံ့ဩစရာ။ လမ်းဘေးဆိုင်သေးသေးလေးက ဟင်းချက်တဲ့သူလက်ရာဟာ ဟိုတယ်က ဟင်းချက်တဲ့လက်ရာ ဟင်းပွဲပြင်တဲ့ အခင်းအကျင်းနဲ့ပါ။
ဟိုတယ်ပြန်ရောက်တော့ ဓါတ်ပုံတွေကူးရင်း ကျနော် အတော်လေး အိပ်ငိုက်နေပြီ။ မကြာခင်ပဲ နှစ်နှစ်ခြိုက်ခြိုက် အိပ်ပျော်သွားတော့တာ။ မနက်မိုးလင်းတာနဲ့ မနက်စာစားပြီး ကားဆရာကို စောင့်ကြတယ်။ ကားဆရာလာတာနဲ့ လေဆိပ်ကို ဆင်းတယ်။ လေဆိပ်တန်းစီရတာ အချိန်နည်းနည်းယူတာမို့ ခပ်စောစောဆင်းကြတယ်။ လေဆိပ်ထဲက ဆိုင်တွေမှာ စျေးဝယ်ရင်း သပ္ပါယ်ဖို့ကောင်းတဲ့ ဘုရားတဆူပင့်လာတယ်။
ဒီခရီးဟာ ကျနော်ကြိုက်နှစ်သက်တဲ့ ရှေးဟောင်းမြို့တွေ၊ ဘာသာရေးဆိုင်ရာတွေ၊ တောင်တက်ခရီး၊ ပင်လယ်ကမ်းခြေ စသည်ဖြင့် ပြည့်စုံတဲ့ ခရီးတခုဖြစ်ခဲ့တယ်။ အရသာရှိတဲ့ အစားအသောက်တွေလည်း ထပ်မံဖြည့်စွက်တော့ အရမ်းကို နှစ်ခြိုက်နေခဲ့ပြီလေ။ အခုအချိန်ထိ ပြန်တွေးရင် နောက်တခေါက်ထပ်ပြီး သွားဦးမယ် စားဦးမယ်လို့ တေးထားမိနေခဲ့တာ....
စာကြွင်း။ ။ကျနော်တို့ ပြန်ပြီး သိပ်မကြာခင် သီရိလင်္ကာ ဗုန်းခွဲတိုက်ခိုက်မှု ဖြစ်ပါတယ်။ ရှေးဟောင်းအဆောက်အဦးများနဲ့ လူသူအများအပြား သေကြေပျက်စီးခဲ့ကြရတယ်။ ခရီးသွားလုပ်ငန်းလည်း အတော်အတန်ကို ထိခိုက်စေခဲ့တယ်။ သိပ်လှတဲ့ အေးချမ်းတဲ့ ဒီနိုင်ငံမှာ ရုပ်ဆိုး အကျည်းတန်စေတဲ့ အဖြစ်အပျက်တွေ ဖန်တီးတဲ့ တယူသန်တိုက်ခိုက်သူတွေကို ဒီပို့စ်ကနေ လုံးဝဆန့်ကျင်ရှုံ့ချပါတယ်။
.jpg)
No comments:
Post a Comment