၂၀၁၂နှစ်များဆီက မြေပဲဆန်သို့

တကယ်တမ်းသွားဖြစ်ခဲ့တာ ၂၀၁၂ကတည်းပါ။ ဒါကြောင့် ၂၀၁၂နှစ်များဆီက မြေပဲဆန်သို့လို့ ခေါင်းစဉ်ပေးဖြစ်ပါတယ်။ ရေးထားဖြစ်တာကြာပေမယ့် ရေးထားဖူးတဲ့ စာအဟောင်းပျောက်သွားတာရော စာမရေးဖြစ်တာ ကြာတာကြောင့်ရော ဒီခရီးစဉ်ကို ခြောက်နှစ်အကြာမှပဲ ပြန်စရေးဖြစ်တော့တယ်....

မြေပဲဆန်ဆိုတဲ့ ထိုင်ဝမ်ကျွန်းကို သွားဖို့မထင်မှတ်ပဲ ဖြစ်လာခဲ့တယ်။ သူငယ်ချင်းတယောက် ထိုင်ဝမ်သားနဲ့ အိမ်ထောင်ပြုမှာကြောင့် ကျနော်တို့ကိုလာစေချင်တယ်ဆိုတာနဲ့ ထိုင်ဝမ်ကိုဘယ်လိုသွားမလဲ ဘာတွေလုပ်မလဲ စလေ့လာပါတယ်။ အရင်က ကိုတီဇက်အေ ဘလော့မှာတင်ထားဖူးတာတွေ သူများတွေ သွားထားဖူးတာတွေ လိုက်ဖတ်ရပါတယ်။

ပထမဆုံးကတော့ ဗီဇာလျှောက်ခြင်းပဲပေါ့။ ကျနော်တို့ခရီးတခုသွားမယ်ဆိုရင် ဒီအလုပ်ကို အရင်လုပ်ရစမြဲလေ။ online application ကို ဒီမှာတင်ပါတယ်။ ပြီးမှ နိုင်ငံကူးလတ်မှတ်နဲ့ ဖောင်ကို PSA building ရုံးမှာသွားတင်ခဲ့တယ်။ ပြန်လာရွေးရမယ့် ရက်ကိုတခါတည်း ရေးပေးလိုက်ပါတယ်။ ဗီဇာရမှာ မပူရတော့ဘူးဆိုတော့ လေယာဉ်လက်မှတ်ကို ဝယ်ရပြီပေါ့။ 

လေယာဉ်လက်မှတ်ကိုတော့ Tiger Airway နဲ့ ဝယ်ဖြစ်ခဲ့တယ်။ တယောက်ကို စလုံး ၃၄၀လောက်ပေးရပါတယ်။ လေယာဉ်လက်မှတ်ပြီးတဲ့အခါ နေစရာ. ဟိုတယ်တွေ ဈေးနှုန်းကတော့ အတော်လေးများနေတာ တွေ့ရပါတယ်။ နောက်တော့ ထိုင်ဝမ်က လိုက်ပို့ပေးမယ့် အမျိုးတယောက် အိမ်နားက အခန်းကိုပဲ ငှားဖြစ်ခဲ့တော့တယ်။ တရက်ကို စလုံး၄၀လောက်ပေးရတယ်ထင်တာပါပဲ။ အခုသေချာ မမှတ်မိတော့ဘူး။

ခရီးစဉ်ကိုတော့ ထိုင်ဝမ်က အမျိုးကပဲ စီစဉ်ထားပါတယ်။ လေယာဉ်က မနက်စောစောလေယာဉ်မို့ နေ့လည် တနာရီခွဲမှာ ထိုင်ဝမ်ကို ရောက်ပါတယ်။ အမေးအမြန်းသိပ်မရှိပါဘူး အေးဆေးပဲ လူဝင်မှုကြီးကြပ်ရေးကို အေးဆေးဖြတ်ပါတယ်။ အပြင်ဖက်မှာလည်း အမျိုးက စောင့်နေပြီ။ သူက သိပ်အားတာမဟုတ်တော့ အားနာမိတယ်။

ကားဆရာပါ ငှားလာတာဆိုတော့ အတော်လေး အဆင်ပြေသွားတယ်။ မဟုတ်ရင် ဘယ်နားကားငှားရမှန်းသိတာမဟုတ်ဘူးရယ်။ အမျိုးအိမ်ကိုရောက်တဲ့အခါ အထုတ်တွေချ နေ့လည်စာ ဟော့ပေါ့ သွားစားကြတယ်။ ဟော့ပေါ့ဆိုင်မှာ အကြိုက်ဆုံးက Häagen-Dazs ရေခဲမုန့်အဝစားကိုပါပဲ။ ဟော့ပေါ့ဆွဲပြီးတာနဲ့ ရထားကဒ်ပြားဝယ်တယ်။ နေ့တပိုင်းလောက်ပဲကျန်တော့တဲ့ ဒီနေ့မှာ ဘယ်ကိုသွားကြမလဲ....

ပထမဆုံး ချန်ကေရှိတ် မမ်မိုရီရယ်ဟောကိုသွားကြတယ်။ တာဝန်ချိန်ပြောင်းကြတာတွေတော့ မတွေ့ခဲ့ရပါပြီ။ 

ချန်ကေရှိတ် မမ်မိုရီရယ်ဟောကနေ ဆွန်ယက်ဆင် မယ်မိုရီရယ်ဟောကို ကူးကြတယ်။ ဆွန်ယက်ဆင်ဟောမှာ မှောင်သည်အထိ ထိုင်ပြီး ၁၀၁ မီးလင်းလာတာ ရေပန်းတွေဖွင့်တာကို ငေးကြတယ်။

မှောင်လာတော့မှ ထိုင်ဝမ်ရဲ့ အဓိကစွဲဆောင်မှုတခုဖြစ်တဲ့ ညဈေးတန်းကို ပတ်ကြတော့တယ်။ ဈေးချိုတယ်ဆိုတဲ့ တီရှပ်တွေကို ဈေးထပ်ဆစ်ပြီးဝယ်ကြတယ်။ ဈေးတန်းတလျှောက်မှာရှိတဲ့ မုန့်တွေကိုလည်း ဘယ်အလွတ်ပေးခဲ့လိမ့်မလဲ.......