ပြန်တဲ့လမ်းမှာ မနက်အရုဏ်ဆွမ်းလောင်းမယ့်အကြောင်းပြောဖြစ်တော့ တိုးဂိုက်က သူစီစဉ်ပေးမယ်တဲ့ တယောက်ကို ယူအက်စ်၁၅ကျပ်လောက်ကျတယ်ထင်တယ်။ ဆွမ်းလောင်းဖုို့ ကြိုပို့လုပ်ပေးမယ် ဆွမ်းစီစဉ်ပေးမယ်၊ ဆွမ်းလောင်းဖို့နေရာဦးပေးထားမယ်တဲ့။ ဒါပေမယ့် သူ့စည်းကမ်းတွေတော့ တလှေကြီးပြောတာပေါ့။ အတိုအပြတ်မဝတ်ရဘူး၊ဆွမ်းလောင်းချိန်မှာ ဒူးထောက်လောင်းရမယ် (ထိုင်ခုံနဲ့ ထိုင်ပြီးလောင်းလို့လည်းရပါတယ် ဒါပေမယ့် ကျနော်တို့တော့ ဒူးထောက်လောင်းခဲ့တယ်)၊ စကားမပြောရဘူး၊ ဆရာတော်တွေကို မော့မကြည့်ရဘူး၊ လောင်းနေရင်း လွတ်သွားခဲ့ရင် နောက်တပါးကို စောင့်လောင်းရမယ် စသည် စသည်....
မနက်ငါးနာရီလောက်မှာ လာကြိုတယ်။ ကားက အရင်ရောက်နှင့်ပါတယ်။ မြန်မာဝတ်စုံပုဆိုးနဲ့မို့ တိုးဂိုက်လည်း ဘာမှ မပြောသာဘူး။ ဦးထားတဲ့ နေရာရောက်တော့ ခင်းပေးထားတဲ့ နေရာမှာ နေရာယူကြတယ်။ ကျနော်ကတော့ ကျနော့ ထရွိုင်ပေါ့နဲ့ကင်မရာကို ဘေးမှာ နေရာယူတယ်။ ဆွမ်းလောင်းဖို့ ဆွမ်းအုပ်လိုမျိုးကို သူတို့ရိုးရာ ဝါးတောင်းလေးတွေနဲ့ စီစဉ်ပေးထားပါတယ်။ ဆွမ်းကတော့ ကောက်ညှင်းပါ။ လက်ကလေးနဲ့ ဆုပ်ဆုပ်ပြီး မကြီးမသေး အနေတော်လေး ဆုပ်ပြီးလောင်းရတယ်။ ဆရာတော်တွေ တန်းစီကြွလာတဲ့အခါ လက်အုပ်ချီပြီးလောင်းပါတယ်။ ဆရာတော်တွေ ကြွတာမြန်တာမို့ ဆရာတော်တိုင်းကို လောင်းမမှီပါဘူး။ ကျောင်းတကျောင်းဆီ တန်းစီကြွတယ်ထင်ပါတယ်။ သံဃာတတန်းနဲ့ တတန်းနည်းနည်း စောင့်ရပါတယ်။
ဆွမ်းလောင်းပြီးတဲ့အခါ ကမ်းနားက နာမည်ကျော် ခေါက်ဆွဲဆိုင်ကိုသွားပါတယ်။ ခေါက်ဆွဲဆိုပြီး မှာပေးတာ ဆန်ပြုတ်ဖြစ်နေလို့ ကျနော် မစားခဲ့ရဘူး။ ဂိုက်က အားနာလို့ သူက ဝက်သားမစားပေမယ့် ယူစားတယ်။ ကျနော့အတွက် ခေါက်ဆွဲ တခြားဆိုင်ကနေ မှာပေးပါတယ်။
ခေါက်ဆွဲဆိုင်က အပြန်ဈေးထဲကနေ ဖြတ်ပြီး ဟိုတယ်ကိုပြန်ကြတယ်။ အသီးအရွက် အသားငါး လတ်လတ်ဆတ်ဆတ်တွေနဲ့ စည်ကားတဲ့ ဈေးလေးပါပဲ။
ဟိုတယ်ပြန်ရောက်တာနဲ့ ပြန်ထွက်ကြတယ်။ စက်ဘီးနဲ့ မြို့ပတ်ကြမယ်။ စက်ဘီးငှားပြီး မြို့ထဲကိုထွက်လာတယ် မရောက်ဖြစ်သေးတဲ့ ဝါးတံတားနဲ့ မြစ်ဆုံကိုအရင်ဝင်တယ်။ ဝါးတံတားကို ဖြတ်ရင် ပိုက်ဆံပေးရပါတယ်။ ဝါးတံတားတဖက်ကမ်းက မြစ်ဆုံအထိ သွားတယ်။ မရောက်သေးတဲ့ Temple တွေကိုမြေပုံနဲ့ဝင်ကြည့်ကြတယ်။ နေ့လည်စာကို Tamarind ဆိုတဲ့ ဆိုင်မှာ ဝင်စားကြတယ်။ အရှေ့နဲ့အနောက် ရောစပ်ထားပြီး ဟင်းထဲမှာ ဟင်းစပ်အမယ်တွေစုံအောင်ထည့်ထားတာမို့ စားရတာဟုံနေခဲ့တယ်။
နောက်တနေရာအဖြစ် Utopia ဆိုတဲ့ဆိုင်ကလေး။ များသောအားဖြင့်တော့ အနောက်တိုင်းခရီးသည်တွေ အကြိုက်နေရာပေါ့။ မြစ်ရဲ့ဘေးမှာ အိပ်ပြီးအနားယူလို့ရတဲ့ ဆိုင်ပါ။ ပုံစံအမျိုးမျိုးနဲ့ အနားယူနေတဲ့ ခရီးသည်တွေကြားမှာ ခဏတာအိပ်စက်ဖြစ်ခဲ့တယ်။
တရေးနိုးလာတဲ့အခါ ဟိုတယ်ကိုပြန်ကြတယ်။ ခဏနား ရေမိုးချိုးပြီး ညစာကို Night market မှာပဲ စားလိုက်ကြတယ်။ ဈေးဝယ်စရာရှိတာတွေကို ထပ်ဝယ်ကြပြန်တယ်။ လာအိုပိုက်ဆံတွေက ပိုရင် ပြန်လဲဖို့ခက်တာမို့ ဖြစ်နိုင်ရင် အဲ့ဒီမှာ ပြန်လဲချင်လဲ ဒါမှမဟုတ် ကုန်အောင်သုံးဖို့ အကြံပြုချင်ပါတယ်။
ဒီတညပြီးရင် တောင်တန်းမြေကနေ ပြန်ကြရတော့မယ်။ မနက်အစောကြီး တိုးဂိုက်စီစဉ်ထားတဲ့ ကားလာကြိုမှာလေ။ အလင်းရောင်မလာခင် မှောင်နေတုန်းမှာ လွန်ပရာဘွန်ကနေခွာခဲ့ကြပြီ။ တောင်တန်းတွေတမျှော်တခေါ်ကြားမှာ စီးနေတဲ့ မဲခေါင်မြစ်ဟာ အရှိန်မပြတ် စီးနေတုန်းပေါ့..........
.jpg)
No comments:
Post a Comment