FELICITATION!!!

မြနှင်းဆီနဲ့ လီဆာ

လွန်ခဲ့တဲ့ဆယ်စုနှစ်ကျော်က မြနှင်းဆီကို ကျနော်တွေ့ရှိခဲ့ပါတယ်။ လီဆာကိုတော့ တနေ့ကမှ တွေ့ရှိခဲ့တာပါ။ လီဆာကိုမြင်မြင်ချင်း မြနှင်းဆီကို ပြေးမြင်မိတယ်။ တကယ်တော့ မြနှင်းဆီဆိုတဲ့ မိန်းမတစ်ယောက်ကို ကျနော်မုန်းတီးခဲ့တာ ဆယ်နှစ်ကျော်ပြီပဲ။ လီဆာကိုကော…..

မြနှင်းဆီကိုဘယ်လောက်မုန်းလဲဆို အဲ့ဒီစာအုပ်ကိုမ၀ယ်ပဲ တမင်ချန်ထားခဲ့တာ။ စာအုပ်သွားဝယ်တိုင်း သူ့ကိုတွေ့တယ်။ ဒါပေမယ့် မုန်းတီးမှုနဲ့ တစ်ဖက်လှည့်မသိချင်ယောင်ဆောင်ခဲ့တာချည်းပဲ။ ဒါပေမယ့် ကိုရုပ်ဆိုးက ကျနော့စာအုပ်စာရင်းမှာ မပါတာမို့ မြနှင်းဆီကို ကျနော့ဆီ ပို့ခဲ့ပါတယ်။ မုန်းတီးစွာနဲ့ပဲ မြနှင်းဆီကို နောက်တစ်ခေါက်ပြန်ကြည့်မိပြန်ရော။

လီဆာကိုတော့ ရုံးက စီနီယာက ရုံမတင်ခင်မှာ ကြည့်ဖို့ပေးခဲ့တယ်။ သူပြောတာက သီချင်းတွေသိပ်ကောင်းတာပဲတဲ့။ ဟုတ်တယ် သီချင်းတွေသိပ်ကောင်းခဲ့တယ်။ ဒါပေမယ့် လီဆာကလည်း မုန်းတီးဖို့ကောင်းပြန်ပါရောလား။

မြတ်စုနဲ့ဖြူလေးကြားမှာ မြနှင်းဆီမရှိခဲ့ရင်ကောင်းမှာလို့ အကြိမ်ကြိမ်ရေရွတ်ခဲ့ဖူးတယ်။ ဒီမိန်းမကြီးကြောင့်ဆိုပြီး လက်ညိုးထိုးစွပ်စွဲချင်ခဲ့တယ်။ ဖြစ်နိုင်ရင် မြနှင်းဆီကို ဆွဲထုတ်ပစ်ချင်ခဲ့တာ။ သိပ်လှသလောက်မာယာများတဲ့ မိန်းမ။ ရှေ့အကြောင်းတွေသာမသိခဲ့ရင် ကျနော်ကိုယ်တိုင်တောင် သူ့ကိုသနားနေမိမှာ။

သာယာလှပတဲ့ ဒဲရစ်တို့ရဲ့ အိမ်ထောင်ပါပဲ။ သားကလေးမွေးတဲ့ အထိ တနင်္လာနေ့တိုင်း ချစ်ဇနီးဆီကို ပန်းတွေပို့တတ်တယ်။ အောင်မြင်တဲ့လူတစ်ယောက်ရဲ့ ဘယ်လောက်သာယာ ချမ်းမြေ့တဲ့ဘ၀လေးလဲ။ ကျနော်လည်း အဲ့လိုဘ၀မျိုးပိုင်ဆိုင်ချင်ပါတယ်။ လီဆာဆိုတဲ့ မိန်းမတစ်ယောက် မပေါ်ပေါက်ခင်အထိပေါ့။

မြနှင်းဆီက ပျော့ညံ့တဲ့ မြတ်စုဆိုတဲ့ ယောင်္ကျားတစ်ယောက်ကို မြူဆွယ်နိုင်ခဲ့တယ်။ မြတ်စုကို လက်ခုတ်ထဲကရေဖြစ်ဖို့ ကြိုးစားခဲ့တယ်။ လူပျိုလူလွတ်မြတ်စုတစ်ယောက် မြနှင်းဆီရဲ့ သွေးဆောင်ဖျားယောင်းမှုအောက်မှာ ကျရှုံးခဲ့ရတယ်။ အကျိုးဆက်ကတော့ ချစ်သူဖြူလေး နဲ့ ဝေးခဲ့ရတာပေါ့။

လီဆာက ဒဲရစ်ကိုနည်းအမျိုးမျိုးနဲ့ချဉ်းကပ်ခဲ့တယ်။ မရရအောင် ယူမယ်ဆိုပြီး ကြိုးစားခဲ့တာ။ ခရစ်စမတ်ညစာစားပွဲမှာ သူ့ကိုငြင်းပယ်ခဲ့တဲ့ ဒဲရစ်ကို အငြိုးနဲ့ပါ။ ဒဲရစ်နောက်က မိသားစုဆိုတာကို မထည့်တွက်ခဲ့ဘူး။ နောက်ဆုံး မိသားစုကိုပါ လိုက်နှောင့်ယှက် ဒုက္ခပေးခဲ့တဲ့အထိ။

မြနှင်းဆီနဲ့လီဆာ နှစ်ယောက်စလုံး ပိုင်ဆိုင်တာက ရူးသွပ်တဲ့စိတ်ခံစားချက်တွေပါပဲ။ သန့်စင်မွန်မြတ်တဲ့ချစ်ခြင်းမေတ္တာကို အရောင်စွန်းအောင်လုပ်ပစ်ခဲ့ကြတာ။ အဆုံးစွန်တဲ့ မှားယွင်းမှုတွေနဲ့ သူတို့လိုချင်တဲ့ ချစ်ခြင်းကို ရအောင်ယူဖို့ကြိုးစားခဲ့ကြတာ။ မိမိကြောင့် သူတစ်ပါးဒုက္ခရောက်ပါစေလို့ ရည်ရွယ်ပြီး မိမိကိုယ်ကို အသက်သေခံသည်အထိ လုပ်ခဲ့တယ်ဆိုမှတော့ ပြောမနေပါနဲ့တော့။ သူတို့ရဲ့ချစ်ခြင်းကကော ဘာများပါလိမ့်။ မိမိချစ်တဲ့သူ ဒုက္ခရောက်မယ့် အရေးလုပ်သင့်လုပ်ထိုက်ပါသလား။

မိန်းကလေးတွေကို ကာကွယ်တဲ့ ဥပဒေအပြင် ယောင်္ကျားလေးတွေကို ကာကွယ်တဲ့ ဥပဒေမရှိသင့်ဘူးလား တွေးနေမိတယ်။ ယောင်္ကျားရင့်မာကြီး တန်ပဲလို့ မပြောပါနဲ့ဗျာ။ ကျနော်တို့မှာလည်း ကျနော်တို့ အားနည်းချက်တွေရှိတတ်ပါတယ်။ အားနည်းချက်ကို ချက်ပိုင်ပိုင် အသုံးချတတ်တဲ့ မိန်းမတစ်ယောက် ဒါမှမဟုတ် လူတစ်ယောက်ကြောင့် ဘ၀တစ်ခု ဒါမှမဟုတ် ဘ၀တစ်ခုနောက်က ဘ၀များစွာ ပျက်စီးသွားရမယ်ဆိုရင်ကောဗျာ။

နောက်ဆုံး ကျနော်ရလိုက်တာကတော့ အစွန်းရောက် ၀ါဒတွေရဲ့ မကောင်းကျိုးပါပဲ။ ဘယ်အရာမဆို တစ်ဖက်စွန်းရောက်သွားရင် မကောင်းမှုတွေဖြစ်တတ်ပါတယ်။ ဘုရားဟော အလယ်အလတ်လမ်းစဉ်ကိုပဲ လိုက်နာကျင့်သုံးသင့်ပါတယ်။

ကျနော့စာရင်းမှာတော့ မြနှင်းဆီနဲ့ လီဆာဆိုပြီး တိုးသွားတာပေါ့ဗျာ….

အကြွေးများ

မမေ့နိုင်

စက်တင်ဘာလရဲ့ အိုက်စက်တဲ့ ညတစ်ညမှာ သူ့ကိုကျနော်တွေ့ရှိခဲ့တာပါ။ ပူလောင်နေတဲ့ အိမ်ရဲ့ အပြင်ဘက်ကို ကျနော်ဂရုမစိုက်နိုင်တော့ဘူး။ တကယ်ပါ အငမ်းမရ သူ့ကိုစိုက်ကြည့်နေမိတာကိုး။ သူ့ကိုနာမည်သာ ကြားဖူးခဲ့တာ တစ်ခါမှ မဆုံဖြစ်ခဲ့ဘူးလေ။ ရင်ဆိုင်အတွေ့မှာ ဖင်ထိုင်မေ့ခဲ့တယ်ဆိုပါတော့….

အစောပိုင်းက ပို့စ်တွေမှာ ရေးခဲ့သလို woodland အိမ်ကိုပြောင်းရခြင်း အဓိကအချက်က စာအုပ်စင်။ စာအုပ်စင်ထဲက စာအုပ်တွေထဲမှာ ခင်ခင်ထူးရဲ့ အညာသူအညာသားဆွေမျိုးများ၊ နုနုရည်အင်းဝ ၂၈နှစ်ရှိပြီဖြစ်တဲ့ မိန်းမတစ်ယောက်အကြောင်း၊ အဏ္ဏ၀ါစိုးမိုးရဲ့ ပင်လယ်ပျော်တွေအကြောင်း စတာတွေကို ဒီစာအုပ်စင်က မိတ်ဆက်ပေးခဲ့တာတွေပါ။

သူ့ကိုလည်း အဲ့ဒီအောက်ဖက်ချောင်လေးထဲက ရှာတွေ့ခဲ့တာ။ ပြီးတော့ သူက clone လေးတစ်ယောက်ပဲ။ စိမ်းဝါရောင်လေးထဲမှာ သူ့ပုံလေးက အတိုင်းသား ထင်းလို့။ သူ့အကြောင်းကို ကျနော်သိခဲ့တာ နည်းနည်းလေးပဲ။ သိတယ်ဆိုရုံလောက်လေးပဲ။ ညံ့လိုက်တာများဗျာ။ တကယ်ဆို ဒီ့ထက်ပိုပြီး သိသင့်တယ်။ မြင်ဖူးတယ်ဆိုတာလည်း အိမ်အပေါ်ထပ် ထုပ်တန်းမှာ ခန့်ခန့်ကြီး ချိတ်ထားတဲ့ ဓါတ်ပုံတစ်ခုထက်မပို။

ကျနော်တွေ့ရှိခဲ့တဲ့ ကျနော်မသိသော သူ့အကြောင်းကတော့…

၁။မေးမြန်းစူးစမ်းတတ်ခြင်း

မိုးတွင်း ဆောင်းတွင်းဟု ခေါ်ကြသော်လည်း နွေရာသီကို အဘယ့်ကြောင့် နွေတွင်းဟု မခေါ်ကြသလဲ၊ ညီအစ်ကိုဝမ်းကွဲရှိသော်လည်း ဘာကြောင့် လင်မယားတစ်ဝမ်းကွဲမရှိသလဲ စသည့်မေးခွန်းများကို ငယ်ဘ၀ထဲက စဉ်းစားတွေးတော မေးမြန်းတတ်သည်။

၂။ ထူးချွန်ထက်မြက်ခြင်း

အတန်းတိုင်းတွင် ပထမရရှိခဲ့သူတစ်ဦး။ စကောလားရှစ်အပြင် ဦးရွှေခိုဆုကိုလည်း ချီးမြှင့်ခံရခဲ့သည်မှာ ထူးချွန်ထက်မြက်သူတစ်ယောက်ဖြစ်မှန်းသိသာထင်ရှားနေပါသည်။ ဘီအယ်လ် (ဥပဒေပညာ) ပထမနှစ်တွင် ကျောင်းသားကိစ္စ နိုင်ငံရေးကိစ္စ အချိန်ပြည့်ဆောင်ရွက်နေသဖြင့် ပထမဆုံးနဲ့ နောက်ဆုံးအကြိမ် စာမေးပွဲကျရှုံးဖူးခဲ့သည်။

၃။လေ့လာမှတ်သားဥာဏ်ကြီးခြင်း

အင်္ဂလိပ်ပါလီမန်မှ ထင်ရှားကျော်ကြားသူများ၏ မိန့်ခွန်းများကို အလွတ်ရသည်အထိ လေးနှစ်အတွင်း ဖတ်ပြီး မှတ်သားထားနိုင်သည်။ ထို့နောက်ထိရောက်စွာ အသုံးချခဲ့သည်။

၎။ ခြိုးခြံချွေတာနိုင်ခြင်း

အစားအစာ မစားပဲ နေနိုင်သည်၊ ဖြစ်သလိုနေထိုင်တတ်သည်၊ စောဒကတက်ခြင်း အလျဉ်းမရှိခဲ့သူဖြစ်သည်။ သူမတူအောင် ခြိုးခြံချွေတာပြီး သည်းခံနိုင်စွမ်းကြီးသူဖြစ်ပါသည်။

၅။ ရဲဝံ့စွန့်စားသူတစ်ယောက်ဖြစ်ခြင်း

ပန်းတိုင်အတွက် အသက်ပေးထားပြီး ဖြစ်သည့်အားလျော်စွာ သတ္တိအပြည့်ဖြင့် ရဲဝံ့စွာ တိုက်ပွဲဝင်သူတစ်ဦးအသေအချာပင် ဖြစ်ပါသည်။ ဘီအိုင်အေ အုပ်ချုပ်မှုလွှဲပြောင်းရေးနှင့် စပ်လျဉ်း၍ ဗိုလ်မိုးကြိုးနှင့် အချေအတင်စကားပြောကြရာ ဗိုလ်မိုးကြိုး ကဓါးကိုဆွဲလျှင် သူကလည်း ဓါးရိုးကိုင်၍ အဆင်သင့်ဖြစ်ကြောင်း သတ္တိပြောင်ခဲ့ခြင်း။ ဖက်ဆစ်ဆန့်ကျင်ရေးတိုက်ပွဲတွင် သရက်ခရိုင်မင်းတုန်းနယ်တွင် ရှေ့တန်းတက်၍ မကြောက်မရွံ့ စီမံခန့်ခွဲခဲ့ခြင်း။

၆။ လူမျိုးမရွေးဘာသာမရွေးစည်းရုံးနိုင်သော သံတမန်ကောင်းဖြစ်ခြင်း

ထူးခြားသော အရည်အချင်းတစ်ရပ်ပင်ဖြစ်သည်။ ကရင်-ဗမာ၊ ကချင်-ဗမာ၊ ရှမ်းတောင်တန်း-ဗမာ ဆက်ဆံရေးအတွက် တကယ့် တံတားကြီးတစ်စင်းဖြစ်ခဲ့ပါသည်။ နောက်ထပ် သူလိုလူ တစ်ယောက် မရှိနိုင်တော့ပါ။

၇။ ရာထူးစည်းစိမ်မမက်မောခြင်း

ဘုရင်ခံက လိုချင်သောရာထူးပေးပါမည်ဆိုသည်ကိုတောင် ပန်းတိုင်ကိုမြဲမြဲစွဲကိုင်လျက် ငြင်းပယ်ခဲ့သူတစ်ဦးဖြစ်ပါသည်။

၈။ ပြတ်သားသူတစ်ယောက်ဖြစ်ခြင်း

အရာရာကိုပြတ်သားစွာ ဆုံးဖြတ်နိုင်သူဖြစ်ပါသည်။ “ယခုလို ကျွန်တော်အကြံပေးတာကိုမှ သဘောမတူပဲ အင်္ဂလိပ်လက်အောက်မှာ နေချင်သေးတယ်၊ သူတို့ပြုသမျှဘဲ ခံချင်သေးတယ်ဆိုရင်တော့ ခင်ဗျားတို့ရဲ့ သဘောအတိုင်းဘဲ။ သို့သော်နောင်ကို ကျွန်တော်တို့အဆိုးမဆိုပါနဲ့။ ကျွန်တော်တို့က နယ်ချဲ့သမားများကို အပြင်းအထန်ချရတော့မှာ ဖြစ်လို့ နယ်ချဲ့သမားနဲ့ပူးနေတဲ့ လူများကိုလည်း ချမှာဘဲ” စသဖြင့် ရှင်းလင်းစွာ ဝေဖန်ပိုင်းခြားပေးနိုင်သူတစ်ဦးပင်။

၉။ ခေါင်းဆောင်ကောင်းတစ်ယောက်ဖြစ်ခြင်း

“ခေါင်းဆောင်လုပ်တဲ့သူလူတွေဟာ နောက်လိုက် လူတွေထက် ပိုပြီး အမြင်ကျယ်ရမယ်။ ခေါင်းဆောင်ဟာ ဟိုလူပြောဟုတ်နိုးနိုး၊ ဒီလူပြော ဟုတ်နိုးနိုး၊ ယောင်ချာချာလုပ်နေရင် ခေါင်းဆောင်မဟုတ်ဖူး။ ခေါင်းဆောင်လုပ်တဲ့သူဟာ ကိုယ်ယုံကြည်တဲ့ ကိစ္စကို တိုင်းသူပြည်သားတွေကို ပြောရဲရမယ်၊ ရှင်းပြနိုင်ရမယ်၊ အသက်စွန့်သင့်တဲ့ နေရာမှာ စွန့်ရဲရမယ်။ ပရိယာယ်သုံးသင့်တဲ့နေရာမှာ သုံးရမယ်။ အချိန်အခါကိုလိုက်ပြီးလုပ်ရမယ်။ အများယောင်လို့ ယောင်ရတယ် အမောင်တောင်မှန်းမြောက်မှန်း မသိဆိုရင် ခေါင်းဆောင်မဟုတ်ဖူး။”

အထက်ပါမိန့်ခွန်းကိုကြည့်ရင် ခေါင်းဆောင်ကောင်းတစ်ယောက်ဖြစ်မဖြစ်ဆိုတာ စီစစ်စရာလိုမယ်မထင်။

စသည်စသည်ဖြင့် သူ့ကိုကျနော်တွေ့မြင်ခဲ့ရပါသည်။ သူ့အကြောင်းကိုသိလျင်သိခြင်း ကြက်သီးမွေးညှင်းထသည်အထိ တုန်လှုပ်မိသည်။ ဓါတ်ပုံကိုကြည့်ပြီးမြင်ယောင်သည်။ လက်တွေ့များ မြင်ဖူးတွေ့ဖူးလျှင် မည်မျှနေမည်မသိ။

သူသည် ကျနော်တို့အတွက် မီးရှူးတန်ဆောင်တစ်ခုပင်။ ဟုန်းခနဲတောက်သော ကောက်ရိုးမီးများလို မဟုတ်။

ထာဝရလင်းနေသည်။ အမြဲလင်းနေသည်။ ထိန်ထိန်ညီးလင်းနေသည်။

ဘယ်တော့မှ မမေ့နိုင်၍ ယနေ့တိုင်လင်းလျက် ထာဝစဉ်လင်းနေမည့် မီးရှူးတိုင်ပင်ဖြစ်ပါတော့သည်။

ကိုးကား - အောင်သန်း၏ အောင်ဆန်း