လိပ်ပြာခွဲသူ

မခင်သီကို အတန်းထဲမှာ စတွေ့တွေ့ခြင်း သူလည်း အများတကာလို ကောက်ချက်ချမိသည်သာ။ ချစ်ခင်နှစ်လိုဖွယ်ကောင်းသော အဆင်းဖြင့် မခင်သီသည် သူတကာတို့၏ စိတ်နှလုံးကို ဆွဲသိမ်းနိုင်ပေလိမ့်မည်။ တတန်းလုံးမျှသာမက တကျောင်းလုံးကပါ နှစ်သက်ဖွယ်သော မခင်သီအကြောင်းကို မကြာခင် တဖွဖွပြန်ကြားသိသောအခါ အံ့သြရိပ်တစက်မှ မစွန်းထင်းခဲ့…..

မခင်သီ၏ သတင်းသည် တနေ့တကြားမွှေးပျံ့လို့သာနေသည်။ သဘောကောင်းသော မခင်သီ၊ ကူညီတတ်သော မခင်သီအဖြစ် ဆရာ၊ဆရာမများကပါ ချီးကျူးထောပနာ ပြုကြလေသည်။ ကျောင်းတွင်သာမက ရပ်ရွာထဲတွင်ပါ ယဉ်ကျေးသိမ်မွေ့သူ၊ မိန်းကလေးပီသသူ အဆင်းသာမက အချင်းပါ လှလေသည်ဟု ကျော်ကြား၍သာ လာတော့သည်။

မခင်သီနှင့် စာကြည့်တိုက်ထဲတွင် စ၍ ရင်းနှီးခဲ့ရသည်။ ကျနော် ဖတ်ချင်၍ မှတ်ခိုင်းထားသော စာအုပ်ကို မခင်သီက ငှားပြီးဖြစ်သော်လည်း ကျနော်ဖတ်ချင်မှန်းသိသည့်အတွက် ယူပါဟူ၍ ပေးလာသည်။ အားတုံ့အားနာဖြစ်မိပါလျက် စာအုပ်မြင်လျှင် မနေနိုင်သော ကျနော်ကလည်း စာအုပ်ကိုဆွဲယူမိပါတော့သည်။ ထိုနေ့မှစ၍ မခင်သီကို စိတ်ရောလူရော ရင်းနှီးလာသည် အထိ ခင်မင်မိခဲ့သည်။

စာဖတ်သူချင်းဖြစ်ရာ ဖတ်ထားသော စာများကို ဆွေးနွေးသည်သာမက စာရေးဆရာများအကြောင်းများဖြင့် ပြောမကုန်နိုင်သော စကားများဖြင့် တနေ့ထက်တနေ့ တိုးပွားလာမြဲ။ စာအုပ်များကိုပါကျော်လာသောအခါ အတွေးအမြင်၊ အယူအဆများ အထိ ပြန့်ပွားလာသည်။ သတိထားမိသည်မှာမခင်သီ..ချစ်သောမျက်စိဖြင့်ကြည့်သောကြောင့်ထင်သည် ပြောသမျှအကြောင်းအရာတိုင်းမှာ အတိုက်အခံဆို၍ တစက်ကလေးမျှ မရှိခဲ့။

ဤသည်ကိုလည်း တနှစ်ခွဲလောက်သော အချိန်ကာလကြာမှ သတိထားမိတော့သည်။ ဖြစ်ကြသည်မှာ…မခင်သီနှင့် တခုံထဲထိုင်သော မေနှင်းပင်။ မခင်သီဆီက ထမင်းဘူးထဲက ဟင်းများကို   မေနှင်းက ယူစားလေ့ရှိသည်တဲ့။ မခင်သီက တခွန်းတပါဒမျှ မပြောခဲ့။ မငြိုငြင်ဘူးလားလို့   ကျနော်မေးသောအခါ မခင်သီရဲ့ စိတ်ရင်းသည် ရှုံ့တွနေခဲ့လျက် အရှေ့တွင် မည်သို့မျှသဘောမထားသည့်နှယ်။ မခင်သီကို ကျနော် သတိထားမိသည်မှာ ထိုမှပင် ဖြစ်သည်…

ကျောင်းနံရံကပ်စာစောင်များ ရေးကြသောအခါ သူသူငှာငှာ ရေးသောစာများကို မရေးလိုကြောင်း ကျနော့ကို ဖွင့်ဟလေသည်။ သူများပေးသော ခေါင်းစဉ်ကို ရေးခြင်းထက် မိမိရင်မှ ဖြစ်သောစာများကိုသာ သီဖွဲ့ခြင်းကို ပိုခုံမင်ကြောင်းပြောရာ ကျနော်မှလည်း အားရ၀မ်းသာ ထောက်ခံခဲ့သည်။ သို့သော် နံရံကပ်စာစောင်တွင် မခင်သီရေးသောစာသည် ထိုခေါင်းစဉ်အောက်မှာ လှပခမ်းနားစွာ ရှိနေလေသောအခါ တခြားကျောင်းသူကျောင်းသားများကဲ့သို့ လက်ခုပ်တီး၍ အားပေးရမလား၊ သူ့ကိုပဲ မေးခွန်းမေးရမလား ဇဝေဇ၀ါ…

ကျနော်ရေးသော အကြောင်းအရာများထဲမှ တချို့သော အကြောင်းအရာများကို မခင်သီက မနှစ်သက်ဟုဆိုရာ ကျနော့မှာ အကြောင်းပြချက်မဲ့စွာ။ လူဆိုသည်မှာ လူတကိုယ် အကြိုက်တမျိုးမို့ သူ မကြိုက်နှစ်သက်ကြောင်း ပြောသည့်အခါ လက်ခံလိုက်ရုံသာ..သို့သော် မခင်သီသည် ကိုသုတနဲ့ ထိုအကြောင်းအရာကို အချီအချဆွေးနွေး၍ နှစ်သက်ခုံမင်ကြောင်း ပြသည်ကို မျက်ဝါးထင်ထင် မြင်မိသည်၌ စိတ်နှလုံးသည် နောက်ကျိ၍လာပေတော့သည်။ မခင်သီသည် တမျိုးပါတကား..နောက်တနှစ် နံရပ်ကပ်စာစောင်တွင် သူကိုယ်တိုင်က ထိုအကြောင်းကို ရေးလေရာ ကျနော့မှာသာ အံ့သြမင်သက်ဖြစ်လျက် ဖတ်မိသည်...

ထိုမှတ၀..ကျနော်နှင့် ကြိုက်နှစ်သက်ခြင်းတူသည်ဟူသော အရာများကို အတန်းထဲမှ ကိုဇော်ဇော်၊ မသော်တာတို့ဖြင့် သူဆွေးနွေးလေသောအခါ မတူညီသည်များကို ထပ်ခါထပ်ခါ ကြားလာရပြန်သည်။ နားလည်ရခက်သော မခင်သီပါပေ။ မခင်သီနှင့် လူတိုင်း ရင်းနှီးသောကြောင့် မခင်သီ၏ အကြောင်းအခြင်းအရာများသည် ပြောသောစကားများမှတဆင့် တယောက်စကား တယောက်နား ကြားတတ်သည်ကို သူသတိမပြုမိလေသလော…

ကျောင်းမှ နောက်တလ နံရံကပ်စာစောင်အတွက် ဆွေးနွေးပွဲကို တက်ရန် မခင်သီကို တခုတ်တရ ဖိတ်ကြားသောအခါ မခင်သီက နေအတော်မကောင်းပါသဖြင့်ဟု အကြောင်းပြန်သဖြင့် ကျနော်တယောက်တည်း သွားဖြစ်ခဲ့သည်။ နောက်တနေ့ နံနက် ကိုမောင်ထွန်းတို့ ဘောလုံးပွဲကို မခင်သီမှ  လာရောက်အားပေးသွားကြောင်း တတန်းလုံး ပြောကြလေသောခါ ကျနော့မှာ ကြောင်စီစီ ဖြစ်ရပြန်သည်။ နေအတော်မကောင်းဘူး မဟုတ်လား။

ထပ်ခါထပ်ခါ ခံရဖန်များသောအခါ ကျနော့အတွက် မခင်သီ၏ လှည့်ကွက်များသည် ရိုးစင်း၍လာပေသည်။ တခြားသူများကို ပြောလေသော် အများချစ်သော မခင်သီကို အပြစ်တင်ကြမည် မဟုတ်ချေ။ အားလုံးနှင့် သင့်တင်လျောက်ပတ်သော မခင်သီလိုလူမျိုးကား ရှားပါးသည် မဟုတ်ပါလော။ နှစ်လိုသည်ဖြစ်စေ၊ မနှစ်မြို့သည်ဖြစ်စေ မခင်သီသည် ပြုံးလျက်နေမြဲ။

နောက်ဆုံး ကျနော်မြင်သည်မှာ မခင်သီသည် လိပ်ပြာများစွာ ခွဲနိုင်သူဖြစ်သည်။ လူတယောက်ချင်းဆီ၏ အကြိုက်ကိုလိုက်၍ တကောင်ချင်း သူ၏ စိတ်လိပ်ပြာများကို ခွဲချပစ်လိုက်နိုင်သည်။ သင် မခင်သီနဲ့ တွေ့ဖူး၍ နှစ်သက်သဘောကျသွားခြင်း မရှိလျှင် ထူးခြားသော လူထူးလူဆန်းဖြစ်နိုင်ပါသည်။ ကျနော်ကတော့ မခင်သီ၏ လိပ်ပြာများ ဆင်မတူ ရောင်ကွဲရုံသာမက များသည်ထက် များလာသည်ကို တနေ့တခြား ရေတွက်၍ ကျေနပ်နေလေသည်....